Юніёрская зборная Беларусі ў хакеі атрымала дзве перамогі ў Чэхіі

Абодва матчы адбыліся ў час вучэбна-трэніровачнага збору беларускай каманды.

Юніёрская нацыянальная каманда Беларусі ў хакеі (U-20) атрымала дзве перамогі над чэмпіёнам моладзевай чэшскай лігі камандай «Тршынец» з лікам 4 : 1 і 5 : 2, паведамілі ў прэс-службе ФХБ.

Абодва матчы адбыліся ў час вучэбна-трэніровачнага збору беларускай каманды ў Чэхіі. У другой гульні, якую выхаванцы Юрыя Файкова выйгралі 5 : 2, хет-трыкам адзначыўся нападнік наваполацкага «Хіміка-СКА» Віктар Гаўрыленка.

«Паўторны матч атрымаўся складаным. Наша каманда амаль перыяд правяла ў меншасці. Нягледзячы на ўсе складанасці, хлопцы вытрымалі ў абароне. Прыемна, што паводле вынікаў гэтых дзвюх сустрэч ужо відаць характар каманды, якая ўдарна папрацавала на трэніроўках і выконвала ўсе ўказанні трэнерскага штабу», – адзначыў галоўны трэнер Юрый Файкоў.