У Расеі спадзяюцца, што кошты на нафту будуць падаць толькі да канца 2017 года

Да канца гэтага перыяду магчымае яшчэ адно падзенне коштаў на «чорнае золата».

На думку кіраўніка Мінэнэрга РФ Аляксандра Новака, да канца 2017 года адбудзецца заканчэнне цыклу нізкіх коштаў на нафту і аднаўленне рынку. Аднак да гэтага магчымае новае падзенне коштаў, мяркуе міністр, хоць гэты перыяд і будзе кароткатэрміновым, піша РБК.

«Шчыра кажучы, я не выключаю кароткатэрміновы адскок назад, але ў цэлым тэндэнцыя будзе крыху вышэйшай», – сказаў ён. «Адскок не выключаю, таму што чыннікі, якія рэзка паўплывалі на цяперашні рост кошту – гэта надзвычайныя сітуацыі ў шэрагу краінаў. Гэта і пажары ў Канадзе, надзвычайныя сітуацыі ў Лівіі і Нігерыі, забастоўка ў Кувейце», – растлумачыў Новак.

На ягоную думку, «аднаўленне балансу попыту і прапановы на рынку нафты пачалося, і да канца 2017 года мы ўбачым заканчэнне цыклу [нізкіх коштаў] і аднаўленне рынку». Новак мяркуе, што пасля 2017 года кошт вернецца ў дыяпазон $ 60 – 65 за бараль.

Як удакладніў Новак, рост здабычы сланцавай нафты можа адбыцца толькі да канца 2016 года. Асноўная прычына падзення здабычы, на ягоную думку, – гэта недахоп фінансавых рэсурсаў і недавер інвестараў да перспектыў галіны.

«Паводле нашых ацэнак, здабыча нават пры цяперашнім кошце на нафту будзе зніжацца, і свайго мінімуму яна дасягне дзесьці ў ліпені – жніўні, яшчэ прыкладна на 700 тыс. бараляў знізіцца здабыча ў ЗША. Гэта нягледзячы на тое, што кошт аднавіўся да ўзроўню, дастатковага для прадаўжэння здабычы», – сказаў ён.

«Але асноўны чыннік – гэта адсутнасць фінансавых рэсурсаў і недавер інвестараў да таго, каб працягваць укладваць. Думаю, што пытанні фінансавання будуць развязаныя, пазыкі рэструктураваныя. Чакаем, што пачынаючы з другога паўгоддзя 2016 года да канца года сланцавая нафта зноў пачне пры такіх коштах рост здабычы», – адзначыў міністр.

Кіраўнік Мінэнэрга таксама растлумачыў, што ў цяперашніх цэнавых умовах ідэя замарозкі здабычы нафты страціла сваю актуальнасць. «На сёння, паколькі мы бачым, што кошты на нафту адскочылі і адскочылі даволі высока ў параўнанні з пачаткам года, то гэтая тэма з замарозкай пакуль страціла сваю актуальнасць. Паглядзім, як далей будзе развівацца сітуацыя», – сказаў ён.

Мінімальны за апошнія некалькі гадоў кошт на нафту маркі Brent быў зафіксаваны ў студзені 2016 года. Тады за бараль Brent на біржы давалі $ 27,10. 26 траўня кошт на нафту маркі Brent перавысіў адзнаку $ 50 за бараль упершыню з лістапада 2015 года. Да гэтага Goldman Sachs апублікаваў аналітычны даклад, згодна з якім дэфіцыт на рынку нафты наступіць ужо ў другой палове 2016 года. Аналітыкі банка тады звярнулі ўвагу на зніжэнне вытворчасці нафты праз перабоі з пастаўкамі, да якіх у ліку іншага прывялі лясныя пажары ў Канадзе і атакі баевікоў у Нігерыі, дзе здабываецца больш за ўсё нафты ў Афрыцы.

У пятніцу, 27 траўня, гандаль у Лондане зачыніўся на адзнацы $ 48,95 за бараль нафты маркі Brent. Кошты на нафту ў асноўным трымаліся вышэй за адзнаку $ 100 за бараль з лютага 2011 да верасня 2014 года, пасля чаго рушыў перыяд іх зніжэння.