Віталь Гуркоў у Менску: Кожная перамога для мяне як першая

Чэмпіён свету Віталь Гуркоў разам з нашымі тайскімі баксёрамі прыляцеў у Менск.

«Кожны раз, як першы», - заявіў Гуркоў «Белсату» пра перамогу ў фінале Чэмпіянату свету ў муай-тай адразу пасля прылёту ў Менск.

Сярод асаблівасцяў гэтага турніру для сябе Гуркоў вылучыў «няпростыя варункі і абставіны» ды іншыя «асабістыя рэчы».

Падчас паўфіналу ягоны родны дзядзька быў на аперацыйным стале. «Рабілі аперацыю на сэрцы», - прызнаўся спартовец.

На пытанне аб футболцы з Пагоняй, у якой ён выйшаў на цырымонію ўзнагароджання, Віталь Гуркоў адказаў: «Футболка як футболка. Ніякіх пытанняў да яе не было».

«Вы любіце спанч Боба або Le Coq Sportif? Дык вось, я люблю такую футболку».

У фінале Чэмпіянату свету ў тайскім боксе, які праходзіць у швэдскім Іёнчэпінгу (Jonkoping), Віталь Гуркоў перамог Экапана Самбаансаба з Тайланда, які не саступаў нікому цягам чатырох гадоў.