У Менску злавілі трэцяга хакера з групы, якая скрала ў ЗША $1,35 мільёна
1- 3.05.2016, 15:20
- 13,193
Яму ўжо выстаўленае абвінавачанне ў крадзяжы ў асабліва значнай суме з дапамогай кампутарнай тэхнікі ў складзе арганізаванай групы.
Прадстаўнікі Следчага камітэта паведамілі пра затрыманне трэцяга ўдзельніка злачыннай хакерскай групы, якая скрала ў амерыканскіх кампаній блізу $1,35 млн. Ім выявіўся мянчук 1972 года нараджэння. Яму ўжо высташленае абвінавачанне ў крадзяжы ў асабліва значнай суме з дапамогай кампутарнай тэхнікі ў складзе арганізаванай групы.
Раней у сталіцы былі затрыманыя двое менчукоў 1981 год і 1974 гадоў нараджэння, якія з'яўляліся актыўнымі ўдзельнікамі злачыннай групы. Хакеры з дапамогай шкоднаснага праграмнага забеспячэння атрымлівалі рэквізіты банкаўскіх рахункаў розных кампаній, а затым спрабавалі легалізаваць скрадзеныя грошы праз фіктыўныя фірмы ў Беларусі, Кітаі, Бангладэш і іншых краінах.
У дачыненні да затрыманых жыхароў сталіцы ўжытая мера стрымання ў выглядзе ўзяцця пад варту. Ім пагражае пакаранне ў выглядзе пазбаўлення волі на тэрмін ад 6 да 15 гадоў з канфіскацыяй маёмасці і з пазбаўленнем права займаць пэўныя пасады або займацца пэўнай дзейнасцю або без пазбаўлення.
Следчы камітэт падкрэслівае, што паспяхова скончыць аперацыю здолелі, дзякуючы суладным дзеянням беларускіх праваахоўнікаў з Федэральным бюро расследаванняў ЗША.