Яшчэ дзевяць беларусаў сталі «Праведнікамі народаў свету»
2- 5.05.2016, 12:25
- 13,289
У Менску ўшаноўвалі ўраджэнцаў Беларусі, якія ратавалі габрэяў падчас Другой сусветнай вайны.
Колькасць ураджэнцаў Беларусі, якім прысвоена званне «Праведнік народаў свету», узрасла да 808 чалавек. Напярэдадні Дня катастрофы і гераізму еўрапейскага яўрэйства, які сёлета прыпадае на 5 траўня, на ўрачыстай цырымоніі ў сталічным музеі гісторыі Вялікай Айчыннай вайны яшчэ дзевяць чалавек былі пасмяротна ўдастоены гэтага звання, паведамляе БелаПАН.
Звання «Праведнікі народаў свету» ганаруюцца людзі, якія, рызыкуючы сваім жыццём і жыццямі родных, ратавалі габрэяў падчас Другой сусветнай вайны.
Праведнікамі народаў свету названыя этнічныя палякі Эдвард Пахалка, яго жонка Эмілія і іх дачка Ванда з мястэчка Відзы. Пахалкі некалькі гадоў хавалі ў сябе сям'ю Старобін - бацьку сямейства Мошэ, яго жонку Хаю і дачку Зельду, а таксама малодшага брата Мошэ Ёсефа. Грамату і медаль праведніка народаў свету за сям'ю Эдварда Пахалкі атрымала яго малодшая дачка Тэрэза, якая дагэтуль камунікуе з Зельдэн Шахам, якая цяпер жыве ў Ізраілі. Разам з мужам Зельдэн прыляцела ў Менск на гэтую цырымонію.
Звання «Праведнік народаў свету» таксама ўдастоіліся браты Іван і Аляксандр Шчакала і іх маці Наталля, дзякуючы якім менчукі Іда Відэрман і яе дзеці Роза і Яфім змаглі адносна бяспечна перачакаць гады Менскага гета ў вёсцы Засулле каля Стоўбцаў. Ганаровую ўзнагароду за сваіх сваякоў атрымала дачка Аляксандра Шчакала Ганна Яраховіч.
Праведнікамі народаў свету назвалі жыхароў Слуцка Канстанціна і Ганну Вайніловічаў, а таксама Варвару Чарнецкую. Вайніловічы схавалі ў закінутым доме Юлію Фалевіч і яе сыноў Барыса і Фрыдрыха, якім удалося бегчы са Слуцка да таго, як восенню 1941 года ў горадзе было знішчана больш за пяць тысяч габрэяў. Праз некаторы час з дапамогай Чарнецкай сям'я Фалевіч змагла далучыцца да партызанаў і хавацца ў лесе аж да вызвалення раёна ў чэрвені 1944 года. Узнагарода была ўручана ўнуку Канстанціна Вайніловіча Генадзю, на цырымонію таксама прыйшоў Фрыдрых Фалевіч, які жыве ў Менску.