Frankfurter Allgemeine: Расейская мафія выкарыстоўвала футбольныя клубы для адмывання грошай

Партугальскія паліцыянты затрымалі трох уплывовых прадстаўнікоў расейскай мафіі.

Партугальская паліцыя разграміла расейскую злачынную групоўку, якая «адмыла некалькі мільёнаў еўраў брудных грошай» пры дапамозе футбольных клубаў, паведамляе нямецкая газета Frankfurter Allgemeine (пераклад - inopressa.ru).

Падчас расследавання, гаворыцца ў артыкуле, 70 партугальскіх паліцыянтаў правялі ператрусы ў 22 дамах і кампаніях і ў чатырох футбольных клубах, а таксама затрымалі трох уплывовых прадстаўнікоў расейскай мафіі. Былі канфіскаваныя значныя сумы гатоўкі. Дапамогу паліцыі больш за год надаваў Еўрапол.

Паводле звестак Еўраполу, злачынцы вышуквалі футбольныя клубы, якія сутыкаліся з фінансавымі цяжкасцямі, і ў іх укараняліся расейскія дабрачынцы, якія дапамагалі клубу фінансава. Другім крокам станавілася купля клуба. Фактычныя ўладальнікі заставаліся цалкам ананімнымі, бо дзейнічалі праз падстаўныя кампаніі ў падатковых органах. Затым яны выкарыстоўвалі клуб і яго фінансавыя аперацыі для адмывання грошай. Кур'еры дастаўлялі грошы ў Партугалію для легалізацыі пры продажы гульцоў на трансферным рынку і ўгоды на права трансляцыі матчаў, паведамляе карэспандэнт.

Такая схема дзейнічала з 2008 года. Еўрапол не падаў якой-небудзь інфармацыі аб футбольных клубах, выкарыстаных у крымінальных схемах, але расейскія «аматары спорту», як растлумачылі ў арганізацыі, звярнулі на сябе ўвагу следчых залішне шыкоўным ладам жыцця і наяўнасцю ў мінулым судзімасцяў.