Праз навальніцы без электрычнасці засталіся 13 раёнаў Менскай вобласці
1- 18.06.2016, 10:59
- 8,612
Непагадзь абрынулася на сталічны рэгіён увечары 17 чэрвеня, хоць там і не здарылася такіх бураў, як у заходніх абласцях.
Паводле інфармацыі прэс-службы Менскага абласнога ўпраўлення МНС, аварыі ў энэргасістэмах здарыліся ў Барысаўскім, Вілейскім, Дзяржынскім, Капыльскім, Лагойскім, Менскім, Маладзечанскім, Мядзельскім, Пухавіцкім, Смалявіцкім, Салігорскім, Уздзенскім і Чэрвеньскім раёнах. Электразабеспячэнне было парушанае ў 281 населеным пункце.
Паводле стану на 6.00 суботы без святла заставаліся 108 населеных пунктаў Менскай вобласці.
Напярэдадні ў Беларусь з Польшчы прыйшлі моцныя буры з навальніцамі. У Гародні падняўся такі моцны вецер, што за лічаныя хвіліны пераламаў ледзь не палову дрэваў у цэнтры горада. Ураган «загасіў» вечны агонь і нахіліў касцельныя вежы з крыжам.
У Брэсце бура была слабейшай, хоць у выніку разгулу стыхіі таксама былі паваленыя дрэвы і памятыя аўто.
Бліжэй да ночы навальнічны фронт перамясціўся ў Менскую вобласць.