У Наваполацку на заводзе «Палімір» грымнуў выбух

(Абноўлена) Выбухная хваля дайшла нават да адпачывальнікаў на возеры Люхава і дамоў на вуліцах Слабадская і Блахіна.

На прадпрыемстве «Палімір» у Наваполацку адбылося ўзгаранне на газаразмеркавальнай устаноўцы ў цэху №104. Пра гэта tut.by паведаміў прэс-сакратар МНС Віталь Навіцкі.

«Цяпер адбываецца факельнае гарэнне, працуюць падраздзяленні МНС. Пацярпелых няма», - распавялі ў МНС.

У сацсетках распаўсюджваецца інфармацыя аб тым, што супрацоўнікаў заводу эвакуявалі, а мясцовым жыхарам прапануюць зачыніць вокны.

Ратавальнікі падкрэсліваюць - небяспекі для жыхароў Наваполацка праз здарэнне на заводзе няма.

Пазней з'явілася інфармацыя, што на «Паліміры» грымнуў выбух. Як адзначаюць карыстальнікі сацыяльных сетак, выбухная хваля дайшла нават да адпачывальнікаў на возеры Люхава і дамоў на вуліцах Слабадская і Блахіна.

Як паведамілі ximik.info ў дзяжурнай частцы МНС, выбух адбыўся ў цэху №104 у выніку разгерметызацыі вядучага трубаправода этэн-этыленавай фракцыі ў рэактар гідрання.

Паводле інфармацыі БелаПАН, паведамленне пра здарэнне паступіла а 13:12. Адбывалася факельнае гарэнне, вышыня полымя складала амаль чатыры метры на этажэрцы газаразмеркавання вышынёй 30 метраў корпуса №305 цэха №104. Пажар быў лакалізаваны а 14:22.