У Расеі патанулі 11 дзяцей у час турпаходу
56- 19.06.2016, 16:15
- 15,181
Надзвычайнае здарэнне адбылося на возеры ў Карэліі.
На возеры Сямозера ў Карэліі загінулі 12 чалавек. Пра гэта заявіў прадстаўнік СК РФ Уладзімір Маркін, паведамляе «Інтэрфакс».
Паводле ягоных словаў, сярод загінулых – 11 дзяцей і адзін дарослы, інструктар паходу.
Узбуджаная крымінальная справа паводле артыкула «аказанне паслуг, якія не адпавядаюць патрабаванням бяспекі і пацягнулі з неасцярожнасці смерць дзвюх або больш асобаў» (ч. 3 арт. 238 КК РФ). Адзін з інструктараў летніка затрыманы.
«Паводле папярэдніх звестак, 18 чэрвеня ўдзельнікі дзіцячага аздараўленчага летніка “Парк-Гатэль Сямозера” на лодках патрапілі ў шторм на вадаёме. На трох плаўсродках знаходзілася 47 дзяцей і 4 дарослыя інструктары. Падчас вандравання па возеры лодкі перакуліліся і патанулі, у выніку 11 дзяцей і 1 інструктар загінулі», – сказаў Маркін.
Пяцёра дзяцей, якія пацярпелі на Сямозеры, шпіталізаваныя ў лякарні Карэліі, паведаміў у нядзелю афіцыйны прадстаўнік Міністэрства аховы здароўя РФ Алег Салагай.
«Усе атрымліваюць неабходную медыцынскую дапамогу. Прычыны шпіталізацыі – пераахалоджванне, няцяжкія траўмы, стрэс», – сказаў ён.