G7 абвесціць аб мерах для заспакаення рынкаў у выпадку выхаду Брытаніі з ЕЗ

Цяпер ідуць перамовы пра змест гэтай заявы.

Фінансавыя лідары «Вялікай сямёркі» выпусцяць заяву, у якой абвесцяць пра гатоўнасць прыняць усе неабходныя меры для таго, каб супакоіць рынкі, калі Брытанія прагаласуе за выхад з Еўразвязу, паведамілі Reuters урадавыя крыніцы, знаёмыя з сітуацыяй (пераклад - РБК).

Паводле іх звестак, цяпер ідуць перамовы пра змест гэтай заявы. Яно пацвердзіць згоду сярод краін G7, што «залішняя валацільнасць і бязладныя рухі валют непажаданыя», адзначыў адзін з суразмоўцаў выдання.

Як піша Reuters са спасылкай на крыніцы, асобную заяву можа выпусціць і японскі міністр фінансаў Тара Аса для пазбягання празмернага росту ены ў выпадку Brexit.

Раней у чацвер, а 9:00 паводле Менску, у Вялікабрытаніі пачаўся рэферэндум аб пытанні выхаду краіны з Еўразвязу.

Апытанні, якія праводзіліся на стадыі падрыхтоўкі да галасавання, сведчылі аб прыкладна аднолькавай колькасці прыхільнікаў і праціўнікаў выхаду. Апошняе апытанне аб гэтым пытанні кампаніі YouGov, апублікаванае The Times у чацвер, аднак, паказала невялікую перавагу праціўнікаў Brexit.

За час, які папярэднічаў рэферэндуму, выказваліся меркаванні аб негатыўных наступствах выхаду Вялікабрытаніі з ЕЗ. Брытанскі міністр фінансаў Джордж Осбарн папярэджваў аб тым, што пры перамозе прыхільнікаў Brexit кабінету міністраў давядзецца знайсці 30 млрд ($42,9 млрд) за чатыры гады.

Эканамісты таксама казалі пра ўплыў выхаду з ЕЗ на фунт. Між іншым, апытаныя Bloomberg эканамісты прадракалі ў гэтым выпадку падзенне фунта да 30-гадовага мінімуму - ніжэй за адзнаку ў $1,35. Мільярдэр Джордж Сорас між тым заявіў 21 чэрвеня, што фунт пры выхадзе Брытаніі з ЕЗ можа зраўняцца з еўра.

Як пісаў раней РБК, урад, цэнтральныя банкі, інвестары усяго свету папярэджвалі, што, калі брытанцы прагаласуюць за выхад, валацільнасць фінансавых рынкаў падскочыць, рынкі акцый і сыравінных тавараў могуць упасці.