Шчоткіна: Маці з дзецьмі да 3-х гадоў павінны працаваць у святы і выхадныя

Акрамя таго, жанчын з малалетнімі дзецьмі можна будзе адпраўляць у камандзіроўкі.

Пра гэта міністр працы і сацыяльнай абароны заявіла на пятым «усебеларускім народным сходзе», паведамляе tut.by.

Трэба адзначыць, што на «сходзе» Мар’яна Акіндзінаўна выступала ў якасці старшыні Беларускага саюза жанчын. Акрамя ўсяго іншага, яна таксама прапанавала перагледзець умовы працы жанчын, якія выйшлі з дэкрэтнага адпачынку да 3-годдзя дзіцяці.

- Сёння мы прапануем унесці змены ў Працоўны кодэкс у частцы зняцця забароны на прыцягненне да працы ў святочныя і выхадныя дні, а таксама накіраванне ў службовую камандзіроўку працуючых жанчын, якія маюць дзяцей ва ўзросце да 3-х гадоў, - заявіла Мар’яна Шчоткіна. - Пагадзіцеся, калі догляд дзіцяці вядзе іншы сямейнік, жанчына не можа быць абмежаваная ў праве рэалізацыі сваіх прафесійных інтарэсаў. На нашу думку, выключна з яе згоды яна можа ў гэты перыяд павышаць сваю кваліфікацыю, праходзіць стажыроўку, працаваць у святочныя дні. Бо яны аплачваюцца падвойнай сумай.

Нагадаем, што згодна з арт.263 Працоўнага кодэкса Беларусі, «забараняецца прыцягненне да звышурочных работ, працы ў дзяржаўныя святы і святочныя дні (частка першая артыкула 147), выходныя дні і накіраванне ў службовую камандзіроўку цяжарных жанчын і жанчын, якія маюць дзяцей ва ўзросце да трох гадоў».

Міністр таксама нагадала, што ў Беларусі «перагледзелі спіс прац, на якія забараняецца прыцягненне да працы жанчын».

- Сёння ў гэты спіс уваходзіць 182 тыпы работ, а не 252, як у 2014 годзе, - склала Мар’яна Шчоткіна.

Нагадаем, што сёння, адказваючы на пытанні журналістаў падчас «усебеларускага сходу» Мар’яна Шчоткіна заявіла, што яна «не феміністка».