Кэмеран заявіў аб адстаўцы пасля рэферэндуму ў Брытаніі

Прэм'ер Брытаніі паабяцаў, што сыдзе ў адстаўку праз тры месяцы.

Прэм'ер-міністр Вялікабрытаніі Дэвід Кэмеран падаў у адстаўку пасля правядзення рэферэндуму аб сяброўстве каралеўства ў Еўразвязе, паведамляе Reuters (пераклад - slon.ru).

Пра гэта ён заявіў раніцай 24 чэрвеня.

Кэмеран растлумачыў, што яго пастанова звязана з тым, што падчас кампаніі, папярэдняй рэферэндуму, ён падтрымліваў прапанову застацца ў складзе Еўрапейскага звязу.

Дэвід Кэмеран заявіў, што пасля абвяшчэння вынікаў рэферэндуму краіне патрэбныя новыя лідары, і паабяцаў, што сыдзе ў адстаўку праз тры месяцы, паведамляе расейская служба ВВС.

Ён таксама заявіў, што вынікі рэферэндуму не прынясуць рэзкіх пераменаў у жыццё брытанцаў.

Большасць тых, хто прыняў удзел у рэферэндуме аб далейшым сяброўстве Брытаніі ў ЕЗ, прагаласавалі за выхад краіны з Еўразвязу: на карысць Brexit выказаліся 52% брытанцаў.

Дэвід Кэмеран удакладніў, што сыдзе ў адстаўку з пасады прэм'ер-міністра Вялікабрытаніі да восені. З яго слоў, ён «ганарыцца тым, што паспеў зрабіць» за час працы ва ўрадзе. «Я змагаўся супраць выхаду ўсім сваім сэрцам, але брытанцы абралі іншы шлях. Значыць, ім патрэбны новы прэм'ер-міністр», - сказаў ён.

Кэмеран у сваёй заяве сказаў, што брытанская эканоміка моцная. Брытанцам, якія жывуць за мяжой, і прадстаўнікам еўрапейскіх краін, якія пражываюць у Вялікабрытаніі, ён абяцае, што неадкладныя перамены паводле вынікаў рэферэндуму не рушаць услед.

Перамовы аб выхадзе, а таксама фармальны запуск працэдуры выхаду Вялікабрытаніі з ЕЗ, згодна з артыкулам 50 Лісабонскай дамовы пачнецца ўжо пры новым прэм'ер-міністры, сказаў Кэмеран. Новага прэм'ера абяруць на з'ездзе Кансэрватыўнай партыі да кастрычніка.