Андрэй Саннікаў: Еўразвяз тэрмінова мае патрэбу ў сур'ёзным перафарматаванні
11- 24.06.2016, 14:33
- 9,451
«Брэксіт» - перамога дэмакратыі і параза здаровага сэнсу.
Такім чынам лідар грамадзянскай кампаніі «Еўрапейская Беларусь» Андрэй Саннікаў пракаментаваў вынікі рэферэндуму ў Вялікабрытаніі.
«Брэксіт»- перамога дэмакратыі і параза здаровага сэнсу. Дакладней, не дэмакратыі, а безадказнага папулізму, які ўсё прыкметней уплывае на дэмакратычныя інстытуты на Захадзе. Еўропа ў жалобе, Крэмль святкуе.
Ніякіх выгод «Брэксіта» ні для Вялікабрытаніі, ні для Еўропы няма. Катастрофа на фондавых рынках пасля рэферэндуму - найлепшае таму сведчанне. І гэта толькі пачатак. Затое Крэмль пацірае рукі ў прадчуванні шчодрых падарункаў: ад паслаблення санкцыяў да змяншэння коштаў брытанскай уласнасці, якую можна будзе прыкупіць з гэтай нагоды. Развязаная ва Украіне вайна прыносіць свой плён: трашчыць Еўропа па швах.
Наогул «Брэксіт» быў лагічны. Няздольнасць Еўропы справіцца з крызісамі на сваіх межах, капітуляцыя нават перад калгаснай дыктатурай Лукашэнкі, не маглі не прывесці да ўзрушэнняў унутры самой Еўропы.
Еўразвяз мае патрэбу ў сур'ёзным перафарматаванні. Прычым тэрмінова. Адмовіцца ад меркантыльнага падыходу да сусветнай палітыкі, ад угод з палітычнымі ашуканцамі і вярнуць каштоўнасці. Інакш затрашчыць ужо Еўраатлантызм. А гэта будзе катастрофа», - напісаў Саннікаў у Фэйсбуку.