Двухбаковай сустрэчы Лукашэнкі ды Пуціна ва Узбекістане не было
11- 25.06.2016, 12:16
- 16,027
Пасля заканчэння саміту ШАС Пуцін паляцеў у Кітай, а Лукашэнка вярнуўся ў Беларусь.
Учора, 24 чэрвеня, закончыўся рабочы візіт Аляксандра Лукашэнкі ва Узбекістан, дзе ён браў удзел у пасяджэнні Рады кіраўнікоў дзяржаў-чальцоў Шанхайскай арганізацыі супрацоўніцтва (ШАС).
Як напярэдадні паведамляла прэс-служба правадыра, у Лукашэнкі былі таксама запланаваны двухбаковыя сустрэчы з лідарамі замежных краін. З якімі менавіта лідарамі - прэс-служба не ўдакладняла.
Як вынікае з афіцыйных справаздач аб выніках візіту, у Лукашэнкі ў Ташкенце прайшлі дзве двухбаковыя сустрэчы: са старшынём КНР Сі Цзыньпінам і прэм'ер-міністрам Індыі Нарэндрам Дамадардасам Модзі. З прэзідэнтам РФ Уладзімірам Пуціным, які таксама браў удзел у саміце ШАС, Лукашэнка тэт-а-тэт не сустракаўся.
Пасля заканчэння саміту Пуцін паляцеў у Кітай, а Лукашэнка вярнуўся ў Беларусь.
Цяпер чальцам Шанхайскай арганізацыі супрацоўніцтва з'яўляюцца Казахстан, Кітай, Кыргызстан, Расея, Таджыкістан ды Узбекістан. Шэсць краін маюць статус дзяржавы-назіральніка пры ШАС: Афганістан, Беларусь, Індыя, Іран, Манголія і Пакістан.