Дэлегаты «Хуралу» прадаюць падораныя ім планшэты?

На буйных беларускіх сайтах прыватных аб'яваў з'явіліся першыя паведамленні аб продажы планшэтаў Samsung Galaxy Tab.

Гэта тыя самыя планшэты, што былі сярод падарункаў удзельнікам «усебеларускага з'езда», піша «Наша Нiва».

Прадавец Арцём з Магілёўскай вобласці хоча збыць такі планшэт за 3 мільёны рублёў. Гэта досыць выгадная прапанова, бо такія прылады каштуюць прыкладна 3,7-4,5 мільёнаў. «Абсалютна новы, у падарунак атрымаў, яшчэ не карыстаўся нават», - сказаў ён журналістам.

Калі карэспандэнты запыталіся, ці ёсць на планшэт гарантыя, то Арцём адказаў, што не.

На наўпроставае пытанне, ці не атрымаў уладальнік планшэт на «сходзе», Арцём адказаў: «Не зусім там». Ніякіх пытанняў, што за «сход», дзе раздавалі планшэты, у прадаўца не ўзнікла.

Галоўны рэдактар «Советской Белоруссіі» Павел Якубовіч заявіў, што планшэты, якія атрымалі ў падарунак удзельнікі «ўсебеларускага сходу» - спонсарская дапамога, а не набытыя за грошы дзяржавы.