Белстат: За рысай беднасці жывуць 511 тысяч беларусаў

Прыкладна 5,4% насельніцтва Беларусі зарабляюць менш за 80 даляраў на месяц.

У Беларусі павысіўся ўзровень малазабяспечанасці насельніцтва, паведамляе БелТА са спасылкай на сайт Нацыянальнага статыстычнага камітэта.

Паводле звестак выбарачнага абследавання хатніх гаспадарак што да ўзроўню жыцця, у першым квартале 2016 удзельная вага насельніцтва з узроўнем сярэдніх наяўных рэсурсаў на душу насельніцтва, ніжэйшым за бюджэт пражытачнага мінімуму (нацыянальнай рысы малазабяспечанасці) склаў 5,4%. Для параўнання: у першым квартале 2015 года ўзровень малазабяспечанасці насельніцтва быў роўны 4,9%.

Сярод рэгіёнаў найменшы ўзровень малазабяспечанасці адзначаны ў Менску (1,1%), найбольшы - у Берасцейскай вобласці (7,9%). У Гарадзенскай вобласці гэты паказчык у першым квартале быў 4,1%, у Менскай вобласці - 4,8%, у Віцебскай вобласці - 6,2%, у Магілёўскай вобласці - 7,5%, у Гомельскай вобласці - 7,6%.

У першым квартале 2016 года разліковая велічыня бюджэту пражытачнага мінімуму ў сярэднім на душу насельніцтва склала 1,6 мільёна рублёў на месяц.