Запазычанасць беларускіх прадпрыемстваў вырасла ў 1,2 раза
- 28.06.2016, 10:23
- 8,590
Пратэрмінаваная крэдыторская запазычанасць прадпрыемстваў з пачатку года вырасла да 30 трыльёнаў.
Пратэрмінаваная крэдыторская запазычанасць прамысловых прадпрыемстваў з пачатку года вырасла на 21,2% да 30 трлн. 93 млрд. рублёў, за красавік - знізілася на 3,4%, паведамляе БелаПАН са спасылкай на звесткі Белстата.
Замежная пратэрмінаваная крэдыторская запазычанасць павялічылася за чатыры месяцы гэтага года на 8,6% і на 1 траўня склала 8 трлн. 788,9 млрд. рублёў. За красавік яна знізілася на 9,2%.
Пратэрмінаваная дэбіторская запазычанасць вырасла з пачатку года на 23,6% да 42 трлн. 214,3 млрд. рублёў, за красавік - на 0,8%. Знешняя пратэрмінаваная дэбіторская запазычанасць павялічылася з 1 студзеня 2016 года на 7,4% і на 1 траўня склала 10 трлн. 161,8 млрд. рублёў. За красавік яна знізілася на 1,2%.
На 1 траўня 2016 года пратэрмінаваная крэдыторская запазычанасць мела 1299 прамысловых прадпрыемстваў, ці 76,9%, пратэрмінаваную дэбіторскую запазычанасць - 1493 прадпрыемствы, або 88,5%.
Пратэрмінаваная запазычанасць у крэдытах і пазыках беларускіх прамысловых арганізацый на 1 траўня склала 10 трлн. 110,4 млрд. рублёў і вырасла ў параўнанні з 1 студзеня 2016 года ў 1,3 раза. За красавік гэты паказчык павялічыўся на 7%.
Агулам запазычанасць у крэдытах і пазыках склала 362 трлн. 718,9 млрд. рублёў, што на 5,4% больш, чым на пачатак года, і на 2,8% менш, чым на 1 красавіка 2016 года.
Пытанні спагнання замежнай пратэрмінаванай дэбіторскай запазычанасці і вяртання валютнай выручкі ў краіну знаходзяцца на пастаянным кантролі органаў пракуратуры, заявіў на прэс-канферэнцыі 24 чэрвеня намеснік генеральнага пракурора Беларусі Аляксей Стук.
З яго слоў, праведзеныя праверкі выканання прадпрыемствамі і арганізацыямі заканадаўства пры здзяйсненні замежнагандлёвых угод. Толькі ў першым квартале гэтага года ў эканамічныя суды пракурорамі пададзеныя 47 позваў больш чым на 54 млн. даляраў ЗША. «Намаганні органаў пракуратуры садзейнічалі зніжэнню крымінальнага складніка на стадыях заключэння і рэалізацыі гаспадарчых дамоў у замежнагандлёвых угодах, вяртанню ў гаспадарчы абарот больш за 32 млн. даляраў ЗША», - сказаў Стук. Каля паловы ўсёй замежнай дэбіторскай запазычанасці прыпадае на расейскія суб'екты гаспадарання.