Як будуць працаваць АЗС у ноч пераходу на новыя грошы

Заправіцца зарання або не спадзявацца на банкавыя карткі.

З 1 ліпеня ў Беларусі пачнецца абарачэнне новых грошай: нулёў стане менш, кіроўцам трэба будзе звыкнуць да новага выгляду коштаў, у тым ліку і на паліўных станцыях. Пакуль больш за ўсё боязі выклікае менавіта момант пераходу, які адбудзецца ўночы з 30 чэрвеня на 1 ліпеня. Банкі ўжо папярэдзілі, што пластыкавыя карты нейкі час дзейнічаць не будуць. А ці зменіцца праца АЗС? Ці можна будзе заправіць самаход у выпадку патрэбы?

З пытаннямі мы звярнуліся ў некаторыя вялікія сеткі АЗС. Усе супакойваюць: праца не спыніцца, хоць нейкі час для пераходу на новую сістэму спатрэбіцца.

Прадстаўнікі сеткі «Газпрамнафта» распавялі Onliner.by, што будзе павялічаны тэхнічны перапынак у працы станцый. Зазвычай ён займае блізу 20 хвілін, але ўночы 1 ліпеня расцягнецца прыблізна на 2 гадзіны: з 23:00 30 чэрвеня да 1:00 1 ліпеня.

- Гэта трэба для таго, каб мы маглі абнавіць і праверыць сістэму. Усё павінна быць дакладна адладжана і стабільна функцыянаваць, бо мы не можам правяраць яе на нашых кліентах, - распавялі ў кампаніі.

Персаналу станцый ужо дадзеная інфармацыя аб парадку працы ў сувязі з дэнамінацыяй, работнікі праінструктаваныя і пра тое, як дзейнічаць у выпадку тэхнічных хібаў.

- Ніякіх праблем узнікнуць не павінна. Аднак мы рэкамендуем нашым кліентам мець патрэбную колькасць гатовых грошай, банкі ўжо далі інфармацыю аб тым, што банкавыя карткі дзейнічаць нейкі час не будуць, - дадалі ў «Газпрамнафце».

Пра тое ж сваіх кліентаў папярэджвае сетка А-100. Уночы на карткі спадзявацца не варта, патрэбная толькі гатоўка. Звяртаем увагу, што тыя грошы, якімі ў Беларусі карыстаюцца цяпер, застануцца ў дзеянні да канца года, няма патрэбы сярод ночы шукаць новыя рублі, каб заправіць бензабак.

- А 23:30 на АЗС будзе абвешчаны тэхнічны перапынак, які прыблізна зойме паўтары гадзіны. Гэтага часу, як мы разлічваем, досыць для таго, каб зрабіць праграмную пераналадку касавай сістэмы. Пасля перапынку праца будзе адноўленая, і кліенты змогуць аплаціць куплі наяўнымі сродкамі. Дзейнасць пластыкавых картак залежыць ад банкаў, магчымыя хібы, - папярэдзілі на А-100.

У кампаніі падкрэслілі, што гатовыя да дэнамінацыі і чакаюць, што для кліентаў яна пройдзе без якіх-небудзь сур'ёзных невыгод. Ім ужо, дарэчы, адпраўленыя SMS з рэкамендацыямі.

«Беларуснафта» таксама папярэджвае кліентаў аб немагчымасці разлічыцца банкавымі карткамі ўночы 1 ліпеня.

У астатнім, як распавялі ў кампаніі, змен у стандартным рэжыме дзейнасці АЗС не плануецца. Каштарысы ў адпаведнасці з патрабаваннямі былі зараней падрыхтаваныя з улікам дэнамінацыі, таксама як і рэкламная прадукцыя.

І кожная сетка рэкамендуе кіроўцам заправіць бак зарання.

А мы нагадваем, што ўстаноўленыя ў Беларусі кошты паліва з 1 ліпеня, мабыць, будуць выглядаць наступным чынам:

- АІ-95 - 1 рубель 19 капеек;

- АІ-92 - 1 рубель 11 капеек;

- ДП - 1 рубель 23 капейкі.