Пентагон распавёў сваю версію «небяспечных манеўраў» расейскага карабля

Пентагон працягвае вінаваціць Расею ў «небяспечных» манеўрах у Міжземным моры.

Са слоў прадстаўніка Еўрапейскага камандавання ВС ЗША Дэні Эрнандэс, словы якога прыводзіць Reuters, 17 чэрвеня расейскі карабель «Яраслаў Мудры» ўчыніў «небяспечныя і непрафесійныя манеўры».

Як паведамляе РБК, Эрнандэс распавёў, што расейскае судна падняло на мачце сігнальны сцяг, які азначае, што карабель абмежаваны ў руху. Пры гэтым, са слоў прадстаўніка Пентагона, карабель манеўраваў, набліжаючыся да эсмінца Gravely. У той час як амерыканскі карабель мяняў курс і хуткасць, расейскі карабель рабіў тое ж самае, што кажа пра тое, што паказаны сігнал быў ілжывым, сцвярджае суразмоўца агенцтва.

У выніку, з яго слоў, эсмінец палічыў, што расейскі карабель наўмысна спрабаваў стварыць перашкоды аперацыям авіяносца Harry S. Truman.

«Гэты апошні выпадак стаў чарговым сярод іншых небяспечных паветраных і марскіх інцыдэнтаў з боку расейскіх вайскоўцаў», - прыводзіць Reuters словы Эрнандэс.

Раней на гэтым тыдні Мінабароны Расеі паведаміла аб небяспечным збліжэнні эсмінца ЗША Gravely з расейскім караблём. Ва ўстанове распавялі, што амерыканскі карабель учыніў небяспечнае збліжэнне з расейскім вартавым караблём «Яраслаў Мудры» да 60-70 м па левым борце і перасёк курс руху карабля на небяспечнай дыстанцыі 180 м. У расейскім міністэрстве таксама адзначылі, што такі інцыдэнт «груба парушае як міжнародныя правілы, так і расейска-амерыканскае пагадненне «ад 1972 года «Аб прадухіленні інцыдэнтаў у адкрытым моры і ў паветранай прасторы над ім».

Амерыканскі бок у сваю чаргу абвінаваціў Расею ў небяспечных манеўрах. Крыніца Reuters у Пентагоне распавядала, што расейскі вайсковы карабель прайшоў за 315 ярдаў (прыкладна 300 м) ад амерыканскага эсмінца Gravely і на адлегласці пяці марскіх міль (9 км) ад авіяносца Harry S. Truman ва ўсходняй частцы Міжземнага мора.