Менчукі супраць парада: Улады прапагандуюць культ вайны

Жыхары сталіцы стварылі петыцыю супраць вайсковага парада, які называюць «бессэнсоўным і бязлітасным выдаткам сродкаў дзяржбюджэту».

«Асфальт у Менску быў сапсаваны танкамі падчас падрыхтоўкі да параду, а ў горадзе апоўначы грукаталі і смярдзелі баявыя машыны. А сёння неабыякавыя менчукі стварылі адпаведную петыцыю на сайце petitions.by. Адметнай асаблівасцю гэтага праекта з'яўляецца тое, што ўсе электронныя подпісы актывісты праекта пераводзяць у папяровы выгляд і самі ходзяць з імі па інстанцыях», - напісаў у сваім блогу Максім Міровіч.

Абгрунтаванне забароны параду ў петыцыі пазначана вось такое: транспартны калапс падчас параду і яго рэпетыцый, пашкоджаны асфальт і разметка, начны шум і забруджванне паветра. У канцы напісана так - «Просьба праводзіць парады з вайсковай тэхнікай на палігонах за межамі горада Менска».

Петыцыю падпісалі ўжо больш за 700 чалавек. Каментары пад петыцыяй прыгожыя, піша блогер:

ULADZIMIR: «У парадзе агрэсія і вар'яцкая нелюбоў да навакольнага свету. Прыдумалі сабе ворагаў і апраўдваюць сваю недасканаласць гатоўнасцю кусацца. Смешна і сумна глядзець на зверападобнае асяроддзе. Хопіць шалець стройнымі шэрагамі».

MONTSINAI: «Гэта дзейства, званае парадам, зусім не адпавядае заяўленай міралюбнай дактрыне РБ. Крывадушнасць!»

ROMA KO: «Адназначна за скасаванне. Бяздумны расход сродкаў і забруджванне навакольнага асяроддзя»

Ірына Сушкевіч: «Улады прапагандуюць культ вайны, велізарныя грошы выкідваюцца на вецер. Сапраўдных ветэранаў засталося вельмі мала, ды і тыя хворыя, і нямоглыя. Для каго парад і навошта?»

FREEDOM FIGHTER: «Бессэнсоўны і бяздумны расход сродкаў дзяржбюджэту - не мэтавае выкарыстанне. Апроч гэтага забруджванне навакольнага асяроддзя ў без таго пыльным і гарачым горадзе. Псаванне гарадской маёмасці - дарожнага пакрыцця. ГОДЗЕ ПАРАДАЎ! НАМ ЯНЫ НА НЕ ПАТРЭБНЫЯ! Развівайце навуку, медыцыну, адукацыю, высокія тэхналогіі. ДОСЫЦЬ У НАС ЗАБІРАЦЬ ГРОШЫ НА ЎСЯКАЕ ГЛУПСТВА!»

ZOJA: «Як можна любавацца вайсковай тэхнікай калі яе прызначэнне забіваць».