Выпускнікі 11-х класаў будуць здаваць экзамен паводле ўсяго курсу гісторыі Беларусі
10- 1.07.2016, 16:20
- 6,435
Раней здаваўся экзамен гісторыі Беларусі з 1917 года да нашых дзён.
З наступнага года выпускнікі 11-х класаў будуць здаваць экзамен паводле ўсяго курсу гісторыі Беларусі, паведамляе БелТА са спасылкай на пастанову Міністэрства адукацыі № 48 ад 20 чэрвеня 2016 года.
Як патлумачыла прэс-сакратар Міністэрства адукацыі Юлія Барадун, змены адбудуцца ў сувязі з тым, што 2016 – 2017 навучальны год скончаць навучэнцы, якія ў IX класе ў гэтым прадмеце выпускны экзамен не здавалі.
На выхадзе са школы ў 11-класнікаў правераць засваенне зместу прадмету «Гісторыя Беларусі» ад старажытных часоў да нашых дзён.
– У 2014 – 2015 і 2015 – 2016 навучальных гадах навучэнцы 11-га класа на экзамене дэманстравалі веданне гісторыі Беларусі з 1917 года і да нашых дзён, паколькі ў 9-м класе імі быў здадзены выпускны экзамен за перыяд з старажытных часоў да 1917 года, – сказала прэс-сакратарка.
Пералік жа прадметаў, паводле якіх выпускнікі наступнага года будуць здаваць экзамены, застанецца ранейшым.
Нагадаем, пасля 9-га класа школьнікі пішуць дыктоўкі на рускай і беларускай мовах і кантрольную ў матэматыцы.
Пасля 11-га класа навучэнцы пішуць пераказ на рускай ці беларускай мове (на выбар), кантрольную ў матэматыцы, у вуснай форме здаюць экзамены гісторыі Беларусі і замежнай мовы.