Пасля спробы дзяржаўнага перавароту Турцыя зачыняе дзве тысячы арганізацый
24- 23.07.2016, 17:37
- 13,870
У Турцыі зачыняецца больш за 1000 прыватных школаў, больш за 1200 фондаў, 19 прафсаюзаў, 15 універсітэтаў і 35 медыцынскіх установаў.
Улады Турцыі абвесцілі пра закрыццё больш як 2000 арганізацый, якія, на думку Анкары, звязаныя з апазіцыйным ісламскім прапаведнікам Фетхулом Гюленом, галоўным палітычным апанентам прэзідэнта краіны Рэджэпа Таіпа Эрдагана, паведамляе расейская служба BBC.
Паводле паведамлення Анкары, у Турцыі зачыняецца больш за тысячу прыватных школаў, больш за 1200 фондаў і дабрачынных арганізацый, 19 прафсаюзаў, 15 універсітэтаў і 35 медыцынскіх установаў.
Улады Турцыі мяркуюць, што Фетхула Гюлен, які жыве ў амерыканскім штаце Пенсільванія, – натхняльнік спробы дзяржаўнага перавароту ў Турцыі, якая адбылася ў ноч на 16 ліпеня.
Сам Гюлен неаднаразова абвяшчаў, што не мае дачынення да путчу, і асуджаў спробу перавароту. Ён таксама адзначыў, што гатовы да экстрадыцыі на радзіму.
Раней віцэ-прэм'ер Турцыі Нурэцін Джаніклі апавёў у інтэрв'ю Бі-бі-сі, што арышты і звальненні каля 60 тысячаў чалавек пасля бунту былі толькі "верхавінай айсберга", і паабяцаў, што арыштаў будзе яшчэ больш.
Сярод звольненых і затрыманых больш за 9 тысячаў паліцыянтаў, 3 тысячы суддзяў і 6 тысячаў вайскоўцаў, а таксама настаўнікі і дэканы ўніверсітэтаў.
Турцыя таксама пастанавіла часова прыпыніць дзеянне Еўрапейскай канвенцыі аб абароне правоў чалавека і асноўных свабодах у сувязі з надзвычайным становішчам у краіне, якое было ўведзенае ўладамі Турцыі на тры месяцы пасля спробы перавароту.
У адпаведнасці з дзейным рэжымам надзвычайнага становішча ўлады Турцыі дазволілі пакідаць пад вартай падазраваных у датычнасці да няўдалай спробы вайсковага перавароту на тэрмін да 30 дзён.
Узброены мяцеж пачаўся ў Турцыі позна ўвечары 15 ліпеня.
Група вайскоўцаў абвесціла, што бярэ кіраванне краінай у свае рукі, каб забяспечыць выкананне канстытуцыйных правоў грамадзянаў. Да ранку турэцкі ўрад здолеў цалкам аднавіць кантроль над сітуацыяй у краіне.
Колькасць ахвяраў сутыкненняў у Турцыі ў ходзе няўдалага вайсковага перавароту склала не менш за 232 чалавекі.