Міхаіла Жамчужнага збілі ў СІЗА?

Міхаіл Жамчужны, верагодна, атрымаў чэрапна-мазгавую траўму.

Пра меркаванае збіццё палітвязня Міхаіла Жамчужнага, які, верагодна, атрымаў чэрапна-мазгавую траўму, Андрэй Бандарэнка паведаміў у лісце да грамадскай актывісткі Ганны Шапуцькі, піша «Новы час».

«...Не магу не ўдакладніць: ці ведаеце вы, што Міхаіла Жамчужнага ўдарыў адзін з кіраўнікоў СІЗА Віцебска? Ведае "Вясна" і ці робіцца нешта ў гэтым кірунку? Наколькі я інфармаваны, усё гэта задакументавана (ЧМТ была ў яго) і ёсць у матэрыялах яго асабістай справы. Перажываю за яго і вельмі спадзяюся, што будучыя выбары пойдуць яму на карысць. Хай трымаецца. Усё будзе добра. Памятаю і малюся пра яго», – напісаў Андрэй Бандарэнка.

Ад Міхаіла Жамчужнага не было лістоў некалькі тыдняў, аднак наўрад ці яму дазволілі б напісаць камусьці пра падобнае здарэнне.

Напісаць Андрэю Бандарэнку можна на адрас: Бандарэнку Андрэю Валер'евічу, 212011, вул. Крупскай, 99, А СТ-4, к. 80.

Міхаілу Жамчужнаму можна напісаць сюды: Жамчужнаму Міхаілу Ігаравічу, 222125, ВК-14, атр. 18, бр.181, ст. Навасады, Барысаўскі р-н, Менская вобл.