Генпракурор Украіны: тых, хто «зліў» відэа з справы Шарамета, звольняць з ганьбай

Юры Луцэнка абвінаваціў праваахоўнікаў у раскрыцці таямніцы следства.

Генеральны пракурор Юры Луцэнка заявіў, што супрацоўнікі праваахоўных органаў, якія перадалі для адкрытага доступу відэа з матэрыялаў следства забойства журналіста Паўла Шарамета, будуць звольненыя з органаў «з ганьбай», паведамляе «112 Украіна».

«Вядома, гэта незаконна. Пытанне ў тым, што гэта проста забівае таямніцу следства і вельмі ўскладняе заданне праваахоўных органаў. І тыя, хто знутры праваахоўных органаў такім чынам зарабляе або папулярнасць, або нават грошы за сенсацыйныя матэрыялы... Мы іх шукаем, мы шукаем гэтых людзей, і як толькі выйдзем, яны абавязкова будуць звольненыя з ганьбай з праваахоўных органаў» – заявіў генпракурор.

Таксама ён паведаміў, што следства правярае інфармацыю пра сачэнне за журналістам Паўлам Шараметам, якое нібыта арганізаваў кіраўнік крымінальнай паліцыі Вадзім Траян.

Аўтамабіль з Шараметам выбухнуў раніцай у сераду, 20 ліпеня, у цэнтры Кіева. Спрацавала ўсталяваная пад дном машыны бомба.

Дарадца кіраўніка МУС Украіны Заран Шкірак заявіў, што следства разглядае тры магчымыя версіі забойства. Гэта прафесійная дзейнасць, непрыязныя адносіны з неназванымі асобамі і «расейскі след». Таксама разглядаецца версія замаху на жыццё кіраўніка «Украінскай праўды» Алены Прытулы. Ёй і належаў аўтамабіль, у якім падчас выбуху знаходзіўся журналіст.