«Хопіць кланяцца!»: Беларускіх таксістаў заклікалі да страйку 29 ліпеня
84- 24.07.2016, 16:16
- 18,590
Беларускі прафсаюз кіроўцаў таксі «Цэнтр» заклікаў менскіх калегаў да акцыі «Стоп-заказ».
Прафсаюз апублікаваў на сваім сайце заклік да менскіх таксістаў адмовіцца ад працы 29 ліпеня.
«Хопіць кланяцца! Неабходна паказаць, што мы таксама штосьці значым і з нашым меркаваннем трэба лічыцца, што мы таксама людзі і ў нас ёсць сем'і, якія трэба карміць, але не за 5500 за км і не за 10 тысяч за заказ».
Прафсаюз заклікаў кіроўцаў выключыць свае планшэты на суткі і правесці час з сям'ёй.
У сваім відэазвароце да калег на сайце аб'яднання старшыня прафсаюза «Цэнтр» Аляксандр Стахоўскі адзначае, што для таго, каб праца таксіста была рэнтабельная, сярэднія тарыфы за кіламетр павінны падняцца з 55 да 75 капеек.
З яго слоў, мэта гэтага калектыўнага выхаднога - прыцягнуць увагу дыспетчарскіх службаў да «рэальна бядотнага становішча ў таксі па ўсім горадзе».
Нагадаем, што вясной гэтага года таксісты Горадні правялі некалькі акцыяў супраць абавязковай устаноўкі ў машынах сродкаў кантролю падатковых органаў (СКПО).