Беларуская алімпійская дэлегацыя паскардзілася на жыллё ў Рыа

Паводле інфармацыі прадстаўнікоў беларускай дэлегацыі, у нумарах для іх не вымытая падлога, брудныя вокны і лесвічныя пляцоўкі.

Са слоў беларусаў, многія дэлегацыі скардзяцца на пах газу ў гатэлях і перабоі з электрычнасцю.

Паводле паведамлення Нацыянальнага алімпійскага камітэта Беларусі, нават нягледзячы на афіцыйнае адкрыццё алімпійскай вёскі, аргкамітэту трэба будзе яшчэ шмат працаваць, каб умовы пражывання адпавядалі ўсім санітарным патрабаванням.

- Прадстаўнікі беларускай дэлегацыі, якія ўжо прыехалі ў Рыа, паведамляюць, што ў апартаментах спартоўцаў адсутнічае гарачая вада, халодная падаецца з перабоямі, не працуе сістэма каналізацыі, маюць патрэбу ва ўборцы падлога, шкло і лесвічныя пляцоўкі, - заявіў Нацыянальны алімпійскі камітэт Беларусі на сваім сайце.

НАК адзначае, што цяпер супрацоўнікі камітэта прыводзяць у парадак апартаменты беларускай дэлегацыі, абсталёўваюць цэнтр аказання дапамогі спартоўцам і штаб.

- Многія НАКі ужо выказваюць сваю незадаволенасць. Так, Алімпійскі камітэт Аўстраліі выступіў з заявай, што алімпійская вёска ў Рыа-дэ-Жанэйра непрыдатная для пражывання праз сур'ёзныя праблемы з вадаправодам і сістэмай электраправодкі, - адзначылі ў камітэце. - Кіраўніца аўстралійскай дэлегацыі Кітым Чылер распавяла аб стрэс-тэстах, праведзеных сумесна з Міжнародным алімпійскім камітэтам (МАК). Падчас іх аўстралійцы ўключылі краны і сістэмы зліву ў туалетах адначасова ў пакоях на некалькіх паверхах, каб паглядзець, як павядзе сябе сістэма. «Сістэма не вытрымала нагрузкі. Вада цякла па сценах, быў моцны пах газу праз праблемы з газавымі калонкамі ў некаторых памяшканнях, адбылося кароткае замыканне ў электраправодцы», - распавяла Чылер.

Між тым аргкамітэт алімпіяды просіць прабачэння за нязручнасці і запэўнівае, што персанал будзе працаваць 24 гадзіны ў дзень, пакуль праблемы не будуць вырашаныя.

- Спартоўцы, якія прыбываюць у вёску і чыё жыллё яшчэ не гатовае, будуць размяшчацца ў іншых апартаментах. Мы прыносім выбачэнні за нязручнасці, якія гэта можа выклікаць, і мы высока цэнім разуменне нацыянальных алімпійскіх камітэтаў у гэты час, - гаворыцца ў паведамленні аргкама.