У Беларусі пачалася акцыя салідарнасці з Ульянай Захаранкай
1- 26.07.2016, 11:50
- 12,910
Праваабаронцы прапануюць падтрымаць маці Юрыя Захаранкі ў барацьбе за праўду пра зніклага сына.
У Беларусі распачатая акцыя салідарнасці з 92-гадовай маці зніклага 17 гадоў таму экс-міністра МУС РБ Юрыя Захаранкі.
«У нас роўна 10 дзён, каб нашымі агульнымі намаганнямі паказаць уладзе, што Ульяна Рыгораўна Захаранка не адна ў сваёй барацьбе за ўсталяванне ісціны пра лёс яе сына», - заклікаюць арганізатары акцыі на праваабарончым bydc.info.
1 жніўня ў Менскім гарадскім судзе будзе разглядацца яе скарга на вызначэнне суда Кастрычніцкага раёна Менска. Суддзя Вольга Біруля не ўважае неабходным сёння задаволіць просьбу маці аб прызнанні Юрыя Захаранкі памерлым, прыпыніўшы справу з фармальных падстаў.
Ульяна Захаранка і яе сям'я маюць поўнае права на маральна- псіхалагічную і сацыяльную рэабілітацыю. Задача ўлады - зрабіць гэта магчымым сёння, а не праз нявызначаны прамежак часу.
«У мяне ўжо вялікія гады - рабіць усё трэба хутка», - кажа Ульяна Захаранка.
Нашы дзеянні:
Пісаць звароты да Лукашэнкі ад імя грамадскіх арганізацый і грамадзян Рэспублікі Беларусь (файл можна раздрукаваць, падпісаць чалавек 10 і паслаць па пошце або адправіць адсканаваны зварот з подпісамі па электроннай пошце contact@president.gov.by да 28 ліпеня 2016 года).
Пісаць звароты ў Менскі гарадскі суд ад грамадскасці Рэспублікі Беларусь (файл можна раздрукаваць, падпісаць чалавек 10 і паслаць па пошце або адправіць адсканаваны зварот з подпісамі па электроннай пошце Minsk@court.by да 28 ліпеня 2016 года).
Раздрукаваць на друкарцы і расклеіць плакат «Мама памятае. А ты?» на пад'ездзе свайго дома, агароджы, тумбе, прыпынку транспарту.
1 жніўня 2016 года а 10.00 мы прыйдзем у Менскі гарадскі суд на пасяджэнне судовай калегіі грамадзянскіх спраў.