Дзмітрыя Паліенку зноў этапавалі ў Жодзінскі следчы ізалятар
5- 26.07.2016, 18:43
- 16,360
Супраць веласіпедыста амаль скончаныя следчыя дзеянні і хутка справа будзе перададзеная ў суд Цэнтральнага раёна Менска.
Як стала вядома ПЦ «Вясна», 22 ліпеня актывіста Дзмітрыя Паліенку перавезлі ў следчы ізалятар №8 г. Жодзіна. Пра гэта паведаміў сам арыштаваны ў лісце да праваабаронцы Насты Лойкі.
Гэта не першы раз, калі Змітра Паліенку этапуюць з СІЗА ў СІЗА, тым самым ствараючы складаныя ўмовы для фізічнага і маральнага стану падследнага.
«Пасля мінулага этапавання ў Жодзіна і назад у мінскае СІЗА ў адным з лістоў Дзмітрый выказваў надзею, што больш этапаў не будзе. Аднак, кіраўніцтва СІЗА пастанавіла інакш.
Я разумею, што гэта можа быць звязана з такімі чыннікамі, як нястача месцаў у менскім СІЗА, так і спробай ціску на яго. Бо этап сам па сабе – гэта вельмі складаная працэдура ў фізічным і псіхалагічным сэнсе, і можа расцэньвацца, як форма катавання зняволеных неабгрунтаванымі перавозкамі ў нязручных клетках.
Да таго ж, калі затрыманага будуць вазіць у суд з Жодзіна - гэта азначае, што высыпацца і паўнавартасна ўдзельнічаць у працэсе Паліенка не зможа», - мяркуе Наста Лойка.
Супраць веласіпедыста амаль скончаныя следчыя дзеянні і хутка справа будзе перададзеная ў суд Цэнтральнага раёна Менска.
Падтрымаць лістамі цяпер можна на адрасе: 222160, Менская вобласць, г. Жодзіна, вул. Савецкая, 22а, СІЗА-8, Паліенку Дзмітрыю Аляксандравічу.
Нагадаем, жорсткае затрыманне веласіпедыстаў-удзельнікаў «Крытычнай масы» адбылося ўвечары 29 красавіка. У выніку грубых дзеянняў АМАПу, было затрымана шэсць чалавек, якіх моцна збілі і адвезлі ў РУУС Цэнтральнага раёна. Пазней чацвёра з затрыманых падпісалі пратаколы аб парушэнні правілаў дарожнага руху і супраціве супрацоўнікам органаў унутраных спраў і ДАІ, а супраць дваіх былі распачатыя крымінальныя справы паводле арт 364 Крымінальнага кодэкса.
Затрыманаму Дзмітрыю Паліенку ўвечары 6 траўня выставілі абвінавачванні.
Праваабарончы цэнтр «Вясна» выступіў з заявай з нагоды ўтрымання пад вартай Дзмітрыя Паліенкі і праінфармаваў Рабочую групу аб адвольных затрыманнях ААН пра справу веласіпедыста.