Ва Украіне забаранілі дзейнасць 243 расейскіх фірмаў, якія фінансавалі «ДНР» ды «ЛНР»
5- 29.07.2016, 15:57
- 10,688
Кампаніі ўнесеныя ўкраінскімі ўладамі ў спіс і для міжнародных санкцый.
Аб гэтым паведамляецца на сайце Службы бяспекі Украіны (СБУ).
Гаворка ідзе пра кампаніі, якія супрацоўнічалі з камерцыйнымі структурамі на тэрыторыі самаабвешчаных рэспублік на Данбасе, але не падпалі пад раней уведзеныя санкцыі.
Назвы кампаній, унесеных у чорны спіс, украінскія ўлады не прыводзяць.
«Служба бяспекі Украіны прадаўжае выкрываць каналы фінансавання тэрарыстычных арганізацый «ДНР» ды «ЛНР» і процідзейнічаць расейскай эканамічнай экспансіі», - гаворыцца на сайце міністэрства.
У верасні 2015 года прэзідэнт Украіны Пятро Парашэнка падпісаў указ аб увядзенні санкцый супраць амаль 400 фізічных і больш за 100 юрыдычных асоб пераважна з Расеі.
Санкцыі прадугледжвалі блакаванне актываў, часовыя абмежаванні на карыстанне належнай ім маёмасцю, прадухіленне вывазу капіталаў за межы Украіны, а таксама візавыя абмежаванні.
Пад санкцыі трапілі вайсковыя ўстановы, СМІ, а таксама банкі, якія прадаўжаюць працу на Данбасе, і авіякампаніі, якія лётаюць у Крым. Пазней санкцыйныя спісы неаднаразова пашыраліся.