У Турцыі вызвалілі 800 падазраваных у датычнасці да паўстання
2- 30.07.2016, 17:20
- 12,119
Стамбульскі суд вызваліў з-пад варты 758 вайскоўцаў, затрыманых паводле падазрэння ў дачыненні да спробы дзяржаўнага перавароту.
Пра гэта паведамляе расейская служба BBC са спасылкай на дзяржаўнае інфармагенцтва Анадолу.
Затрыманыя, у тым ліку курсанты вайсковых вучэльняў, былі адпушчаныя пасля дачы паказанняў. Суд не ўбачыў неабходнасці трымаць іх пад вартай.
У агульнай складанасці суд разгледзеў справы 989 вайскоўцаў, 231 чалавек быў пакінуты ў зняволенні.
Паводле апошніх звестак, дзевяць з нечым тысяч чалавек, большасць з якіх вайскоўцы, былі арыштаваныя пасля бунту.
Дзясяткі тысяч людзей, уключаючы тысячы ўніверсітэцкіх выкладчыкаў, былі адхіленыя ад сваіх пасадаў. Былі закрытыя больш за дзве тысячы арганізацый.
У ноч на 16 ліпеня група вайскоўцаў абвясціла, што бярэ кіраванне краінай у свае рукі, каб забяспечыць выкананне канстытуцыйных правоў грамадзян. Да раніцы турэцкаму ўраду ўдалося цалкам аднавіць кантроль над сітуацыяй у краіне.
У выніку мяцяжу загінулі 246 чалавек, без уліку змоўшчыкаў, 2185 чалавек атрымалі раненні.
Улады Турцыі ўважаюць за натхняльніка спробы дзяржаўнага перавароту Фетхулу Гюлена, які жыве ў амерыканскім штаце Пенсільванія. Сам Гюлен неаднаразова заяўляў, што не мае дачынення да путчу, і асуджаў спробу перавароту.