Bild am Sonntag: Палова немцаў – супраць пераабрання Меркель

Ангела Меркель зноў адтэрмінавала пастанову пра тое, ці будзе яна зноў прэтэндаваць на пасаду канцлера.

Палова немцаў выступае супраць новага, чацвёртага тэрміну знаходжання Ангелы Меркель на пасадзе канцлера ФРГ. З наступным знаходжаннем Меркель на пасадзе кіраўніка ўрада Нямеччыны гатовыя пагадзіцца толькі 42 адсоткі ўдзельнікаў апытання, праведзенага сацыялагічным інстытутам Emnid на замову штотыднёвіка Bild am Sonntag, паведамляе DW.

У той самы час, паводле вынікаў даследавання, апублікаваных у нядзелю, 28 жніўня, сярод прыхільнікаў Хрысціянска-дэмакратычнага звязу (ХДЗ) за новы тэрмін Меркель на пасадзе канцлера выступаюць 70 адсоткаў рэспандэнтаў, а 22 адсоткі – супраць.

Паводле звестак СМІ, Ангела Меркель зноў адтэрмінавала пастанову пра тое, ці будзе яна зноў прэтэндаваць на пасаду кіраўніка ўрада. Яна вызначыцца ў гэтым пытанні толькі ў пачатку 2017 года, пасля таго як высветліцца, ці акажа ёй падтрымку партнёр ХДЗ у блоку – Хрысціянска-сацыяльны звяз.

Наступныя выбары ў бундэстаг адбудуцца восенню 2017 года.