Прадпрымальнік: Падаткавікі паводзяць сябе нахабна і прыкрываюцца Лукашэнкам

Інспектары вымагалі хабар у дырэктара віцебскай фірмы і давялі яго да банкруцтва.

Адна з віцебскіх фірмаў, ТАА «Праект Еўразія», праходзіла планавую праверку Інспекцыі Міністэрства падаткаў і збораў Кастрычніцкага раёна горада Віцебска.

У дакументацыі кампаніі прысутнічала ўнутраная накладная, якая апынулася няправільнай, і з гэтай прычыны праверкай было наважана канфіскаваць блізу 120 упаковак ламініраваных падлог (кампанія займалася гандлем будаўнічымі матэрыяламі), якія павінны былі пайсці ў бюджэт краіны.

Аднак адной канфіскацыяй на карысць дзяржавы справа не абмежавалася. Як сцвярджае дырэктар «Праекта Еўразія» Сяргей Аляксеевіч Акуліч, інспектары вымагалі хабар у выглядзе 200 упаковак ламінату. У гэтым выпадку падатковай інспекцыі і кампаніі ўдалося б «разысціся мірна».

Аднак Сяргей Аляксеевіч не пагадзіўся адкупіцца ад Інспекцыі такім спосабам і звярнуўся ў Інспекцыю Міністэрства падаткаў і збораў Віцебскай вобласці. Скарга была агучана ў вуснай форме, пасля чаго начальніца паабяцала дапамагчы ва ўсім разабрацца і папрасіла нікому не паведамляць пра тое, што здарылася. Пасля гэтага вымагаўшых хабар інспектараў адхілілі ад праверкі ў фірмы Сяргея. Замест іх у «Праект Еўразія» быў накіраваны інспектар з абласной падатковай. У выніку фірма... збанкрутавала.

Была затрымана вялікая колькасць тавару, афіцыйная прычына - неадпаведнасць тавару і лішкаў на складзе.

«Калі мы пераязджалі са старога на новы склад, была надрукаваная ўнутраная накладная на перасоўванне тавару. У выніку збою кампутарнай праграмы яна была няправільная: быў паказаны не ўвесь ламінат, а толькі яго частка. Гэта адыграла на руку Інспекцыі, якая не ўзяла ў разлік ніводнай накладной на тавар, набыты да нашага пераезду. Мы паведамілі аб збоі і надрукавалі рух тавару па кожнай пазіцыі з пачатку дзейнасці нашай фірмы без спасылкі на ўнутраную накладную, на што супрацоўнік падатковай сказаў, што ад яго нічога не залежыць», - распавёў прадпрымальнік выданню «Віцебскі кур'ер».

Сяргей Акуліч двойчы звяртаўся ў Інспекцыю Міністэрства падаткаў і збораў, ужо ў пісьмовай форме, з просьбай разабрацца і дасканала ўнікнуць у рух тавару фірмы. Але на звароты прыходзілі звычайныя адпіскі.

Адбылося 2 судовыя паседжанні: у Эканамічным судзе Віцебска і Вярхоўным судзе, дзе паседжанне прайшло без удзелу Сяргея. Прычына простая: пра тое, што суд адбудзецца, папярэдзілі за 1 дзень. На просьбу перанесці пасяджэнне было адказана адмовай. Па рашэнні суда усё засталося без зменаў. Дакументацыя фірмы, у тым ліку і накладныя, не былі вернутыя дырэктару.

Мы спадзяваліся, што Эканамічны суд Віцебска разбярэцца з праблемай, але калі суддзя сказаў, што калі не браць у разлік нашу няправільную накладную на перамяшчэння тавару з аднаго склада на іншы, лічбы ўсё роўна не сыходзяцца, стала ясна, што ён не ўнікаў у паперы.

«Паседжанне Вярхоўнага суда прайшло без нас, нават рашэнне мне не хацелі выдаваць на рукі, кажучы, што яно нам не патрэбнае. Цяпер, пасля ўсяго, усё ж хочацца і далей дамагацца праўды і справядлівасці. Чаму, калі інспектар хоча канфіскаваць тавар і ў бюджэт, і ў сваю кішэнь, яго начальства дае на гэта поўны карт-бланш? Чаму нават на складзе ва ўжо складзены і падпісаны вопіс уносіліся карэкціроўкі і папраўкі? Навошта ў нас канфіскавалі ўсе накладныя і іншую дакументацыю, і нават пасля суда падатковая іх не вяртае?», - кажа бізнэсовец.

Праз нейкі час дырэктар «Праекта Еўразія» даведаўся пра тое, што канфіскаваны ў яго фірме ламінат прадавалі ў Расеі коштам амаль удвая разы таннейшым, чым закуплялі яго ў вытворцы ў Кітаі. Пры гэтым расейскім пакупнікам паведамлялася, што гэта канфіскаваны тавар з РБ, а менавіта з Віцебска, і дакупіць у выпадку неабходнасці яго можна будзе менавіта ў нашым горадзе. Уласна, менавіта дзякуючы некалькім пакупнікам, што звярнуліся па пэўным відам ламінату, Сяргей Аляксеевіч і даведаўся аб гандлі канфіскатам на тэрыторыі РФ.

«Пры правядзенні праверкі інспектара апісалі ў нас тавару на 400 мільёнаў рублёў, але калі б прыйшлі два кантэйнеры з ламінатам, які мы замовілі і чакалі ў канцы 2015 года, бюджэт атрымаў бы блізу 200 мільёнаў толькі ў выглядзе мытных плацяжоў і ўвазнога ПДВ.

Пасля згалення нашай фірмы расейскі заснавальнік, ад якога залежала наша дзейнасць, адмовіўся працаваць у РБ, а значыць, ад нас ужо не пойдзе ў бюджэт аплата мытных плацяжоў і ўвазнога ПДВ, а гэта вельмі вялікія сумы.

Плюс да таго мы адмовіліся ад рэкламы, сайта і многіх іншых паслуг, даходы ад якіх ішлі ў іншыя кампаніі і з якіх у бюджэт таксама адпраўляліся падаткі. Вельмі многія пасля такіх праверак спусташаюцца і з'язджаюць на пошукі шчасця ў Расею, дзе працуюць на карысць расейскай эканомікі, хіба гэта правільна?», - разважае прадпрымальнік.

Нягледзячы на шматлікія звароты Сяргея Аляксеевіча ў падатковую, факт вымагання хабару пацверджаны не быў. Відэа- і аўдыё- довадаў сапраўды няма, але ж тады атрымліваецца, што і факт невымагання хабару таксама не пацверджаны і не можа быць даведзены.

«Падчас праверкі інспектары паводзяць сябе нахабна і бесцырымонна, кажуць, што мы махляры і нас трэба караць любымі спосабамі. Калі зробіш ім заўвагі, кажуць, усе пытанні да Лукашэнкі. Я мяркую, гэта няправільна: прыкрывацца уладай», - распавядае бізнэсовец.

Такія нервовыя хваляванні нікому не ідуць на карысць. Жонка Сяргея Аляксеевіча праз гэткія перажыванні страціла дзіця.

«Калі пасля ўсіх непрыемнасцяў на працы ты даведаешся аб цяжарнасці жонкі і проста свецішся ад шчасця, здаецца, што ўсё не так і дрэнна. Але пасля страты дзіцяці цярпенне скончылася. Напэўна, не кожны зразумее, што дзеецца ў мяне ўнутры. Я маю намер дамагацца праўды і шукаць справядлівасць, якая, я ўпэўнены, рана ці позна ўсё ж будзе адноўлена», - кажа прадпрымальнік.