Абама і Эрдаган абмяркуюць экстрадыцыю Гюлена на саміце G20
- 31.08.2016, 17:16
- 20,119
Турэцкія ўлады называюць грамадзяніна ЗША Фетхулу Гюлена арганізатарам спробы ваеннага перавароту ў краіне.
Прэзідэнт ЗША Барак Абама і прэзідэнт Турцыі Рэджэп Таіп Эрдаган абмяркуюць магчымасць экстрадыцыі турэцкага апазіцыянера Фетхулы Гюлена на саміце краін «вялікай дваццаткі» ў Кітаі, заявіў прадстаўнік прэзідэнта Турцыі Ібрагім Калын, паведамляе расейская служба ВВС.
«Падчас перамоваў у Кітаі, вядома, будзе абмяркоўвацца пытанне аб экстрадыцыі Гюлена. Мы чакаем яе... Цяпер праца ў гэтым кірунку вядзецца», - сказаў Калын.
Турэцкія ўлады называюць грамадзяніна ЗША Фетхулу Гюлена арганізатарам нядаўняй спробы ваеннага перавароту ў краіне. Сам ён сцвярджае, што зусім не мае дачынення да гэтага.
У сваёй калонцы для французскага выдання Monde Гюлен заяўляў, што калі хоць бы дзясятая частка абвінавачванняў супраць яго будзе даведзеная, то ён гатовы вярнуцца ў Турцыю і адбыць самае строгае пакаранне.
Фетхула Гюлен уважаецца ў Турцыі другім паводле ўплыву чалавекам пасля прэзідэнта Эрдагана. Яны былі паплечнікамі, калі апошні прыйшоў да ўлады, аднак потым іх шляхі разышліся.