Трох расейскіх спартовак пазбавілі медалёў Алімпіяды ў Пекіне

Расейскія спартоўкі павінны вярнуць медалі Алімпіяды-2008 у Пекіне.

Расейскія цяжкаатлеткі Надзежда Яўсцюхіна і Марына Шаінава, а таксама бягуха Таццяна Фірава павінны вярнуць медалі Алімпіяды-2008 у Пекіне, у выніку пераправеркі допінг-проб згодна з пастановай Міжнароднага алімпійскага камітэта (МАК), апублікаванай на сайце арганізацыі, паведамляе ru.DELFI.lt.

Міжнароднай федэрацыі цяжкай атлетыкі і Сусветнай асацыяцыі лёгкаатлетычных федэрацый прапануецца перагледзець вынікі турніраў з удзелам расеек. Яўсцюхіна на АГ-2008 здабыла бронзу ў вагавой катэгорыі 75 кг. Шаінава стала сярэбранай прызёркай у вазе 58 кг. Фірава ўзяла сярэбраны медаль у эстафеце 4х400 мэтраў.

Яўсцюхіна таксама з'яўляецца трохразовай чэмпіёнкай свету (2011, 2013, 2014). Шаінава - чатырохразовая чэмпіёнка Еўропы (2005-2007, 2011). Фірава - двухразовая чэмпіёнка свету (2005 і 2013).