Відавочцы паведамілі аб паху дыму на станцыі метро «Плошча Перамогі»

На месца выехала некалькі машын МНС.

Аб падазроным паху гарэлым на платформе станцыі метро «Плошча Перамогі» паведамілі пільныя гараджане. На месца неадкладна выехалі супрацоўнік МНС. Прэс-сакратар Менскага гарадскога ўпраўлення МНС Віталь Дэмбоўскі супакоіў менчукоў: машын прыбыло шмат, бо метро з'яўляецца сур'ёзным аб'ектам, піша onliner.by. Аднак прычына паху гарэлым была нязначнай.

- На станцыі метро «Плошча Перамогі» ўнутры пах гарэлага, прыбылі, высвятляем. Машын шмат, бо сур'ёзны аб'ект. Падрабязнасці ўдакладняюцца, - паведаміў прэс-сакратар Менскага гарадскога ўпраўлення МНС Віталь Дэмбоўскі.

Прычынай турботы пасажыраў стаў пах тлення ізаляцыі ў дапаможным памяшканні. Віталь Дэмбоўскі удакладніў, што адбылося «аплаўленне ізаляцыі кандыцыянера без наступнага ўзгарання ў падплатформеннай прасторы». Тленне ліквідаванае. Цяпер метро працуе ў звычайным рэжыме, эвакуацыя людзей не спатрэбілася.