Рэжым Лукашэнкі губляе пункт апоры

Знешняя і ўнутраная «стабільнасць» Беларусі апынуліся міфам.

Знешняя і ўнутраная стабільнасць Беларусі могуць быць падарваныя, калі не будуць урэгуляваны наяўныя рознагалоссі з Расеяй што да цаны энэрганосьбітаў.

Такая выснова ўтрымліваецца ў апублікаваным 21 верасня дакладзе персаналу Міжнароднага валютнага фонду эканамічнай сітуацыі ў Беларусі, паведамляе БелаПАН.

У дакуменце, між іншым, адзначаецца, што Беларусь схільная да вонкавых і ўнутраных шокаў і ваганняў узроўню даверу, а гэта можа прывесці да крызісу пад уздзеяннем макрафінансавай узаемасувязі.

«Паніжэнне (падвышэнне) цэн на энэрганосьбіты можа знізіць (павысіць) тэмпы росту і ўзровень знешнеэканамічнай стабільнасці. Знешняя і ўнутраная стабільнасць могуць быць падарваныя, калі не будуць урэгуляваны наяўныя на сённяшні дзень рознагалоссі з Расеяй адносна цэнаў энэрганосьбітаў», - падкрэсліваецца ў дакладзе персаналу МВФ.

Ацэньваючы патэнцыйныя рызыкі, экспэрты фонду таксама робяць выснову, што ў выпадку новага істотнага зніжэння курсу нацыянальнай валюты адбудзецца паслабленне карпаратыўных і банкаўскіх балансаў і ўзроўню даверу хатніх гаспадарак, што абумоўлена высокай ступенню далярызацыі, неадпаведнасцю валютнай структуры, абмежаваным доступам да валютнай ліквіднасці і значнымі валавымі патрэбамі ў знешнім фінансаванні, складнікамі прыкладна 18 млрд даляраў ЗША (35% УБП).

У цэлым, на думку экспэртаў МВФ, кароткатэрміновыя макраэканамічныя перспектывы для Беларусі - працягваецца эканамічны спад і ўстойліва высокі ўзровень інфляцыі.

У рамках базіснага сцэнару (з частковымі карэкціроўкамі), які быў прадстаўлены персаналам МВФ, тэмпы эканамічнага росту, як чакаецца, застануцца адмоўнымі сёлета (мінус 3%), і ў наступным (мінус 0,5%), а адносна сціплае аднаўленне эканамічнага росту пачнецца ў 2018 годзе (плюс 0,5%). Пры гэтым працэс аднаўлення будзе са спазненнем ісці за аналагічным працэсам у Расеі, што тлумачыцца больш слабымі балансамі і структурнымі перашкодамі ў Беларусі.

Як чакае персанал МВФ, узровень інфляцыі ў Беларусі на канец снежня складзе 13% у гадавым выразе. Гэта амаль на 1 адсоткавы пункт больш, чым у папярэднім годзе, што ў асноўным абумоўлена зніжэннем абменнага курсу і павышэннем тарыфаў на камунальныя паслугі. У рамках базіснага сцэнару мяркуецца, што інфляцыя цягам наступных трох гадоў будзе заставацца ў дыяпазоне нізкіх двухзначных паказчыкаў. У рамках сцэнарыя карэкціроўкі мяркуецца, што больш эфектыўнае ажыццяўленне эканамічнай палітыкі дазволіць знізіць узровень інфляцыі прыкладна да 6% да 2020 года.

Нагадаем, газавы спрэчка паміж Беларуссю і Расеяй доўжыцца з пачатку 2016 года. Менск намагае на зніжэнні кошту расейскага газу, Расея з гэтым не згодная і абвінавачвае беларускі бок у парушэнні кантракту. Для стымулявання выплаты запазычанасці Масква ў трэцім квартале скараціла пастаўкі нафты на беларускія НПЗ. У чэрвені віцэ-прэм'ер РФ Аркадзь Дварковіч заявіў, што да скарачэння паставак прывяла недаплата беларускага боку за пастаўлены прыродны газ. Ён таксама падкрэсліў, што Расея не павялічыць пастаўкі нафты ў Беларусь, пакуль не будзе выплачаная запазычанасць за газ.

20 верасня Лукашэнка назваў ціскам з боку Расеі зніжэнне паставак нафты ў Беларусь праз спрэчку аб цане газу, а таксама даручыў ураду аптымізаваць удзел Беларусі ў інтэграцыйных праектах.