Вольга Маёрава: АГП здраджвае сваім прынцыпам
42- 22.09.2016, 11:33
- 22,569
Пагадзіўшыся з прызначэннем Канапацкай у «палатку», партыйнае кіраўніцтва перайшло рысу дапушчальнага ў палітыцы.
Пра гэта спікер Аб'яднанай грамадзянскай партыі Вольга Маёрава заявіла ў інтэрв'ю «Белгазеце».
«Гэта здрада тым прынцыпам, пра якія мы гаварылі, напрыклад, летась, калі крытыкавалі пазіцыю «Гавары праўду». У нас адбыўся сход у офісе, я задала пытанне з гэтай нагоды Анатолю Лябедзьку, а ён у сваім адказе фактычна паўтарыў усю леташнюю рыторыку Андрэя Дзмітрыева. Тады гэта катэгарычна крытыкавалася і ўважалася непрымальным, зараз жа лідар нашай партыі заняў процілеглую пазіцыю».
Маёрава сцвярджае, што Канапацкая ў бытнасць кіраўніком сталічнай арганізацыі АГП «нічога не рабіла на гэтай пасадзе»:
«У партыі тлумачылі, што ў Ганны свой бізнэс, і яна не можа ім рызыкаваць... Цяпер жа яна прыходзіць у «палату прадстаўнікоў», у яе застаецца той жа бізнэс і тыя ж праблемы».
Са слоў Вольгі Маёравай, старшыня АГП Анатоль Лябедзька не стаў склікаць спікераў арганізацыі, каб абмеркаваць сітуацыю, якая склалася:
«Ён адказаў, што ў гэтым няма неабходнасці, бо ў партыі няма магчымасці ўплываць на пастанову Ганны».
Таксама Маёрава адзначае, што ў сваіх агітацыйных матэрыялах на выбарах Канапацкая пазбягала згадваць АГП і яе праграму «Мільён працоўных месцаў»:
«Нам патлумачылі, што гэта была ідэя Канапацкай, пасля таго, што адбылося некалькі разоў паўтарылі, што з Ганнай былі праведзены гутаркі, яна раскаялася і прызнала, што не мела рацыі».
Падсумаванне Маёравай такое:
«Праблема тут не ў пазіцыі самой Канапацкай, а ў пазіцыі партыі: ці гатовая яна пераступіць праз прызнанне гэтых фальсіфікацый і пагадзіцца з тым, што яе кандыдата ўсё роўна прызначаюць у парламент. Ёсць водападзел, праз які я асабіста перайсці не магу, але партыя, на жаль, яго перасягнула».
Вольга Маёрава мяркуе:
«Калі мы прызнаем незаконнасць і карыстаемся гэтай сітуацыяй, каб далей змагацца за закон, то гэта - верх цынізму».