Беларусь верне корпус рэактара БелАЭС у Расею

Расейскі бок павінен панесці ўсе выдаткі для замены корпуса рэактара БелАЭС.

Беларусь вяртае корпус рэактара пасля няштатнай сітуацыі ў адпаведнасці з дамоўленасцямі з Расеяй, паведаміў журналістам генеральны дырэктар ГП «Беларуская АЭС» Міхаіл Філімонаў на палях 60-й сесіі Генеральнай канферэнцыі МАГАТЭ ў Вене, паведамляе БелТА.

«Корпус - гэта адна з адзінак абсталявання, вельмі хутка такія пытанні не развязваюцца, трэба ўлічваць працу чыгункі і іншыя пытанні. Усё ідзе паводле тых дамоўленасцей, якія ў нас ёсць з Расеяй. Расейскі бок забярэ корпус рэактара, гэта адназначна, такая пастанова прынятая, а далей ідзе працэс яе рэалізацыі», - растлумачыў Міхаіл Філімонаў.

Гендырэктар акцэнтаваў увагу, што будаўніцтва станцыі цяпер вядзецца ў штатным рэжыме, ідзе мантаж абсталявання. «Значная частка абсталявання ўжо паступіла на пляцоўку ў Астраўцы і знаходзіцца на стадыі мантажу, напрыклад, ужо вядзецца мантаж турбін», - паведаміў Міхаіл Філімонаў. У працэсе вырабу яшчэ прыкладна 40% абсталявання.

Нагадаем, інцыдэнт на будпляцоўцы БелАЭС адбыўся 10 ліпеня гэтага года. Падчас перамяшчэння корпус рэактара для БелАЭС праслізнуў па кроквах і сутыкнуўся з зямлёй праз тое, што будаўнікі парушылі інструкцыю перамяшчэння грузаў. Паводле звестак «Расатама», няштатная сітуацыя не пашкодзіла корпус.

Праз месяц Беларусь прыняла пастанову замяніць корпус рэактара. У «Расатаме» з пазіцыяй Менска пагадзіліся, даўшы зразумець, што ўважаюць за прычыну замены не меркаванні бяспекі, а грамадскае меркаванне.

Беларускі бок намагаў: замяніць корпус наважана пасля аналізу камплекта дакументаў спецыялістамі, якія прыйшлі да высновы, што пацвердзіць бяспеку корпуса немагчыма.

Першы блок БелАЭС павінен быў запрацаваць у 2018 годзе, другі - у 2020-м. Наколькі зрушыцца графік, пакуль невядома. Можна падумаць, што не менш чым на 2 гады. Вытворчы цыкл вырабу корпуса рэактара ВВЭР-1200 з моманту пачатку вытворчасці нарыхтовак да адгрузкі займае 840 дзён.

Чакаецца, што выдаткі для замены корпуса рэактара па ўмовах кантракту лягуць на генпадрадчыка - АТ «Атамэнэргаэкспарт», падраздзяленне «Расатама».