На Гомельшчыне людзі перакрылі вуліцу, каб ім паклалі асфальт

Лепшай стала толькі тая дарога, па якой праязджаў картэж Лукашэнкі.

Папрасілі лепшае, а атрымалі горшае. Замест ранейшага дзіравага асфальту цяпер на вуліцы Міра - адсеў друзу. Жыхары вуліцы Міра з такім рамонтам дарогі не пагадзіліся і правялі акцыю пратэсту, паведамляе «Белсат».

«Мы дарогу перакрылі з мэтай таго, каб нам зрабілі па-чалавечы, не пыл, а паклалі асфальт!» - звярнула ўвагу жыхарка вуліцы Міру.

І кіраўніцтва ў асобе кіраўніка і ідэолага Ельскага райвыканкама ў гарачай кропцы з'явілася, але адказаць ні нам, ні людзям не захацела.

«Быў які-ніякі асфальт, але яго ўзарвалі ў суботу ў спешным парадку».

«Вось гэтым засыпалі і сказалі, будзеце жыць да самай смерці».

«Нам казалі: асфальту ніякага не чакайце - гэта ўсё, што будзе. Дзеці алергікі - дыхаць гэтым пылам», - паскардзіліся мясцовыя жыхары.

Няма дарог, але ёсць радыяцыя

Ельскі раён уважаецца найбольш пацярпелым ад выбуху на Чарнобыльскай АЭС. Дарэчы, менавіта гэты раён на гадавіну чарнобыльскай катастрофы сёлета наведаў асабіста кіраўнік краіны, каб сказаць жыхарам, што ўмовы іх жыцця палепшацца. Але лепшай стала толькі тая дарога, па якой праязджаў картэж Лукашэнкі.

«Трэба стварыць такія ўмовы, асабліва ў сельскай мясцовасці, у раённых гарадах, каб моладзь, нашы дзеці імкнуліся вярнуцца ў гэтыя гарады, каб яны не імкнуліся збегчы ў нейкі вялікі густанаселены горад. І мы гэта зробім», - абяцаў Лукашэнка.

Мясцовыя ўлады, відавочна, зразумелі па-свойму: каб жыхары не з'язджалі, яны проста зруйнавалі дарогу. І цяпер насельнікі вуліцы Міра сваю светлую будучыню спрабуюць разгледзець праз клубы пылу. Больш сціплымі сталі і іх жаданні:

«Хоць бы той асфальт нам вярнулі, які быў у ямках», - падагульніла жанчына.