Інтэрнэт стаў таньней :: Хартыя'97 :: Навiны

З 1 студзеня ў Беларусі зьніжаюцца тарыфы на паслугі доступу да сеткі Інтэрнэт. Тарыфы зьніжаны у сярэднім на 20адсоткаў, для прадпрыемстваў і арганізацыяў - на 50. Зьніжэньне тарыфаў стала магчымым дзякуючы пашырэньню зьнешніх інтэрнэт-каналаў і ліквідацыі множнасьці курсаў беларускага рубля.

Памер штомесячнай аплаты пункта доступу да Інтэрнэту для нацыянальных пастаўшчыкоў паслуг (без уліку ПДВ) зьніжаецца з 1.672 да 1.318 даляраў ЗША пры хуткасьці патоку 64 Кбіт/с і з 3.175 да 2.510 даляраў пры хуткасьці патоку 128 Кбіт/с. Аплата пункта доступу з гранічнай велічынёй хуткасьці патоку (2Мбіт/с) зьмяншаецца з 33.435 да 26.423 долараў.

Тарыфы на транспартныя паслугі камуціруемага доступу ў Інтэрнэт для насельніцтва зьніжаюцца з 18,8 да 13 рублёў за хвіліну ў працоўныя дні з 8 да 20 гадзінаўаў, з 11,2 да 10 рублёў у працоўныя дні з 20 да 8 гадзін і з 9,2 да 8 рублёў у выхадныя і святочныя дні кругласутачна, а для прадпрыемстваў - адпаведна з 0,037 да 0,017, з 0,028 да 0,01 і з 0,018 да 0,01 даляраў ЗША за хвіліну.

Разам з тым тарыфы на паслугі беспарольнага доступу ў Інтэрнэт па коду 8-600-100 зьніжаюцца для прадпрыемстваў, але павялічваюцца для насельніцтва. Для прадпрыемстваў доступ патаньнее з 0,055 да 0,034 даляраў за хвіліну ў працоўныя дні з 8 да 20 гадзінаў, з 0,028 да 0,014 у працоўныя дні з 20 да 8 гадзінаў (у выхадныя дні застанецца на ранейшым узроўні - 0,018 долара з 9 да 2 гадзінаў, 0,009 - з 2 да 9 гадзінаў). Для насельніцтва доступ падаражэе з 14 да 14,9 рубля ў працоўныя дні з 20 да 8 гадзінаў, з 9,2 да 9,8 рубля ў выхадныя дні з 9 да 2 гадзінаў, з 4,6 да 4,9 рубля ў выхадныя дні з 2 да 9 гадзінаў (у працоўныя дні з 8 да 20 гадзінаў тарыф застанецца на ўзроўні 28 рублёў).