У новым годзе на Беларусь хлыне нелегальная міграцыя :: Хартыя'97 :: Навiны

У 2001 годзе варта чакаць значнага павелічэньня патоку нелегальных мігрантаў праз Беларусь. Пра гэта 2 студзеня заявіў БелаПАН намесьнік старшыні Дзяржаўнага камітэту пагранічных войскаў рэспублікі генерал-маёр Мікалай Кохан. Паводле ягоных слоў, такі прагноз абумоўлены ўвядзеньнем у будучым годзе Польшчай візавага рэжыму з азыяцкімі дзяржавамі і з краінамі СНД, у тым ліку з Беларусьсю. Але, калі з Беларусьсю Польшча ўводзіць візавы рэжым у сярэдзіне года, то з Манголіяй, з некаторымі дзяржавамі Садружнасьці - ужо з 1 студзеня.

У самой рэспубліцы, паводле ацэнак праваахоўных органаў, зараз знаходзяцца 120-150 тысячаў нелегальных мігрантаў, праінфармаваў ён. Апрача таго, у прыгранічных да Беларусі абласьцях Расеі і Украіны, паводле наяўных звестак, знаходзяцца адпаведна прыкладна 1,5 мільёны і 600 тысячаў "нелегалаў".

Намесьнік старшыні Дзяржкамітэта нагадаў, што Беларусь з`яўляецца транзітнай дзяржавай, праз яе праходзяць асноўныя эўрапейскія калідоры: другі (Парыж - Берлін - Варшава - Мінск - Масква - Ніжні Ноўгарад) і адгалінаваньне дзевятага (Кіеў - Мінск - Вільнюс - Каўнас - Клайпеда - Калінінград). Таму новая сітуацыя, зьвязаная з працэдурнымі, тэхнічнымі і фінансавымі пытаньнямі, створыць значную напружанасьць для рэспублікі, лічыць Мікалай Кохан.