Адвакат дэпутата Кудзінава патрабуе амністыі для падабароннага :: Хартыя'97 :: Навiны

Тацьцяна Станкевіч - адвакат палітвязьня дэпутата Вярхоўнага Савета Уладзіміра Кудзінава - накіравала 3 студзеня ў Менскі абласны суд наглядную скаргу. Адвакат настойвае на зьмяненьні прыгавору ў сувязі з увядзеньнем у дзеяньне з 1 студзеня 2001 года новага Крымінальнага кодэксу Рэспублікі Беларусь.

У адпаведнасьці з артыкулам 5 закона аб увядзеньні ў дзеяньне новага КК, калі ў новым Крымінальным кодэксе прадугледжана больш мяккае пакараньне за тыя злачынствы, па якіх раней ужо былі вынесены прыгаворы, то яны павінны быць перагледжаны ў адпаведнасьці з патрабаваньнямі новага заканадаўства.

Уладзімер Кудзінаў 4 жніўня 1997 года быў прыгавораны да 7 годоў турмы за нібыта зьдзйсьненыя эканамічныя злачынствы. Потым да яго была прыменена амністыя і тэрмін пакараньня скарочаны на 2 гады. У новым Крымінальным кодэксе артыкул, паводле якога ён асуджаны, прадугледжвае меньшы тэрмін пазбаўленьня волі. Таму прыгавор, як лічыць адвакат, павінен быць зьменены ў адпаведнасьці з новым КК, а Кудзінаў - вызвалены.

Уладзімір Кудзінаў вінаватым сябе не прызнае. Ён неаднаразова заяўляў, што стаў ахвярай спланаванай правакацыі неўзабаве пасля таго, як падчас канстытуцыйнага крызісу ў лістападзе 1996 года выступіў за імпічмент Аляксандра Лукашэнкі. Упэўненасьць у невінаватасьці,Кудзінава выказваюць яго сваякі, а таксама найаўтарытэтныя праваабарончыя арганізацыі й міжнародныя структуры. Калегі Кудзінава па Вярхоўнаму Савету сабралі ўжо каля тысячы подпісаў эўрапэйскіх парлямэнтарыяў у яго абарону.