Кіднэпінг па-беларуску :: Хартыя'97 :: Навiны

Больш за два тыдні правёў у палоне студэнт Акадэміі кіраваньня пры прэзыдэнце РБ Мікалай Н. Хлопца захапілі яшчэ 21 сьнежня мінулага года ў Менску. Бандыты некалькі разоў мянялі месца ўтрыманьня палоннага, а паралельна вялі перамовы з ягонымі сваякамі. Апошняй сумай, якая называлася ў якасці выкупу, былі ажно 116 тысячаў даляраў. Цікава, што такія велізарныя па беларускіх мерках грошы патрабавалі за хлопца, бацька якога лічыцца беспрацоўным. Між тым бандыты зусім не былі падобнымі да вар`ятаў.

Задумаў аперацыю па кіднэпінгу чалавек, які добра разьбіраўся ў рэаліях ценявога бізнесу. І ўсё ж бандыты пераацанілі свае магчымасьці - у мінулую суботу банда была "накрытая" ў райцэнтры Петрыкаў Гомельскай вобласці. Міліцыянты вызвалілі і палоннага, самаадчуваньне якога аказалася збольшага нядрэнным. Цяпер студэнт ужо рыхтуецца да сесіі, а ягоныя выкрадальнікі паўстануць перад судом. Сярод іх, як сьцвярджае міліцыя, і жанчына, якая быццам бы працавала на адказнай пасадзе ў "Беларусбанку".

Акрамя кіднэпінга, гэтая гісторыя цікавая яшчэ і тым, што чарговы крымінальны скандал зачапіў Акадэмію кіраваньня пры прэзідэнце Беларусі. На жаль, усё часцей здараецца такое, што супярэчыць словам Аляксандра Лукашэнкі пра "флагман вышэйшай адукацыі, дзе павінны вучыцца лепшыя зь лепшых".

Нагадаем, зусім нядаўна 24 гады зняволеньня за забойства атрымаў былы студэнт факультэта мэнэджменту гэтай ВНУ Валерый Скакун. А трохі раней быў асуджаны другі навучэнец акадэміі, які працаваў памочнікам пракурора Кастрычніцкага раёна Мінску. Цяпер вось гэтая гісторыя са студэнтам, бацька якога беспрацоўны, але ў стане заплаціць стотысячны выкуп. Карацей, "лепшыя з лепшых" працягваюць зьдзіўляць свет і свайго патрона.