Нас чакае новы рост запазычанасьці па зарплаце :: Хартыя'97 :: Навiны

За апошнія два тыдні, паводле зьвестак афіцыйнай статыстыкі, у Беларусі рэзка скарацілася запазычанасьць па заработнай плаце. Па стану на 31 сьнежня запазычанасьць па зарплаце ў краіне складала 0,9 адсоткі ад агульнага фонду заработнай платы. Гэта ў 4 з лішкам разы ніжэй за аналагічны паказчык на канец лістападу - тады ён дасягаў 3,8 адсоткі ад фонду зарплаты. Аднак у бліжэйшы час спецыялісты прагназуюць чарговы рост даўгоў па зарплаце.

Найбольшая частка запазычанасьці па-ранейшаму прыпадае на сельскую гаспадарку. Поўнасьцю ліквідаваць доўг (зноў жа паводле афіцыйных звестак) удалося Віцебскай і Мінскай абласьцям, дзе па стану на 1 сьнежня сітуацыя з выплатай зарплаты была найбольш складанай.

Такому аператыўнаму пагашэньню даўгоў па зарплаце, якія апошнія некалькі месяцаў пастаянна расьлі, безумоўна, садзейнічаў указ прэзыдэнта "Аб прыцягненьні да адказнасьці службовых асобаў, якія не забясьпечылі своечасовую і поўную выплату заработнай платы". Указ уступіў у сілу 23 сьнежня і прадпісваў пагасіць запазычанасьць да канца года.

Разам з тым у бліжэйшы час спецыялісты прагназуюць чарговы рост даўгоў па зарплаце, паколькі без агульнага аздараўленьня эканомікі адміністрацыйныя меры могуць мець толькі кароткачасовы эфект.