Дэлегацыя АГП адправілася ў Берлін :: Хартыя'97 :: Навiны

10 студзеня дэлегацыя Аб`яднанай грамадзянскай партыі адправілася ў Берлін. АГП будуць прымаць у Эўрапэйскі дэмакратычны зьвяз - буйную міжнародную арганізацыю, якая аб`ядноўвае большасьць правацэнтрысцкіх партыяў Эўропы (у прыватнасьці, Хрысьціянска-дэмакратычную партыю Германіі, Кансэрватыўную партыю Велікабрытаніі, "Унію вольнасьці" Польшчы).

АГП атрымае статус сталага назіральніка, і гэта, на думку Анатоля Лябедзька, "вельмі важкая падзея". "Праца ў Эўрапэйскім дэмакратычным зьвязе дазволіць нам наладжваць кантакты на міжпартыйным і міжпарлямэнцкім ўзроўні, - адзначыў ён у інтэрв`ю "БДГ". - Як правіла, у міжнародных арганізацыях правацэнтрысцкія партыі маюць невялікую колькасьць. Мы разьлічваем на ўзмацненьне нашых пазыцыяў у міжнародных структурах разам з Саветам Эўропы і Парлямэнцкую асамблею АБСЕ".

Працэдура ўступленьня ў Эўрапэйскі дэмакратычны зьвяз вельмі складаная, але для АГП былі зроблены бязпрэцэндэнтныя саступкі. "Праца ў ЭДЗ палягчае партыі магчамасьці па камунікацыі напярэдадні прэзыдэнцкіх выбараў", - мяркуе Анатоль Лябедзька. У студзені ў Страсбурзе будзе працаваць сэсія Парлямэнцкай асамблеі Савету Эўропы. Статус спэцыяльна запрошанага для Беларусі быў замарожаны пасьля правядзеньня рэферэндуму 1996 года, аднак перыядычна афіцыйныя ўлады спрабуюць узнавіць працу ў гэтай структуры. У рэшце атрымоўваецца, што эўрапэйцы запрашаюць дзьве дэлегацыі - афіцыйных асобаў і апазыцыянэраў. Паважліва выслухваюць абодва бакі і жадаюць афіцыйнай дэлегацыі посьпехаў у спасьціжэньні асноваў дэмакратыі. Гэты год не стане выключэньнем з правілаў. Анатоль Лябедзька лічыць верагодным атрымаць запрашэньне ад адной з фракцыяў.