У "Беларусі" падтрымалі Домаша :: Хартыя'97 :: Навiны

Больш за трыццаць прадстаўнікоў грамадзкіх арганізацыяў, незалежных прафсаюзаў, іншых аб`яднаньняў грамадзянаў краіны падтрымалі 16 студзеня ў Менску кандыдатуру лідара "Рэгіянальнай Беларусі" Сямёна Домаша як адзінага кандыдата ад беларускай апазыцыі на прзыдэнцкіх выбарах 2001 года. Заява пра падтрымку Домаша была агучана пры ўрачыстай абстаноўцы ў канферэнц-залі гатэлю "Беларусь"

ЗАЯВА

Мы, прадстаўнікі грамадзкіх арганізацыяў, падтрымоўваем ініцыятыву рэгіёнаў Беларусі разглядаць кандыдатуру Сямёна Мікалаевіча Домаша ў якасьці адзінага кандыдата ад аб`яднанай апазыцыі на будучых прэзыдэнцкіх выбарах.

Нелегітымны і не прызнаны міжнароднай супольнасьцю рэжым давёў нашу краіну да жабрацкага стану, пазбавіў нас элементарных правоў і свабодаў, дыскрэдытуе Беларусь на міжнароднай арэне. Людзі Беларусі трываць гэтага больш не жадаюць. Мы здольныя аб`яднацца і дамагчыся посьпеху.

Верым, што Сямён Домаш здолее, абапіраючыся на здоровыя сілы грамадзтва, аб`яднаць вакол сябе народ Беларусі і перамагчы ў сумленнай барацьбе.

Мы давяраем яму як чалавеку, які даказаў сваю прыхільнасьць да прынцыпаў дэмакратыі, здольнасьць не на словах, а на справе забясьпечыць беларускаму народу свабоду і росквіт. І мы разам бярэм на сябе адказнасьць дамагчыся гэтага ў бліжэйшы час.

Мы ведаем, што пераважная большасьць грамадзянаў Беларусі хоча переменаў і што разам мы здольныя іх здзейсьніць. Заклікаем усе арганізацыі і партыі, усіх, хто больш не жадае жыць у стане зьнявагі, далучыцца да нас і падтрымаць наш выбар.

Аліева Марыя - Грамадзкае аб`яднаньне "Беларуская арганізацыя працоўных жанчынаў", г.Менск

Тарасевіч Зінаіда - Беларуская асацыяцыя ахвяраў палітычных рэпрэсіяў, г.Менск

Трусаў Алег - Грамадзкае аб`яднаньне "Таварыства беларускай мовы імя Ф.Скарыны", г.Менск

Быкаў Генадзь - Свабодны прафсаюз Беларусі, г.Менск

Бабаед Віктар - Асацыяцыя дэмакратычных прафсаюзаў, г,Менск

Кобаса Міраслаў - Фонд імя Льва Сапегі

Беляцкі Аляксандар - Праваабарончы цэнтар "Вясна", г.Менск

Саньнікаў Андрэй - Народны унівэрсітэт, г.Менск

Хашчавацкі Юры - Антыфашыстоўскі камітэт, г.Менск

Карпенка Людміла - Міжнароднае грамадзкае аб`яднаньне імя Г. Карпенкі, г.Менск

Хацько Анатоль - Прафсоюзны камітэт Гродзенскага заводу аўтамабільных агрэгатаў, г.Гародня

Варанец Міхал - Грамадзкае аб`яднаньне "Воля да разьвіцьця", г.Слонім

Закурдаеў Леанід - Грамадзкае аб`яднаньне ветэранаў вайны, працы й абаронных сілаў, г.Гародня

Кавальчук Мікалай - Грамадзкае аб`яднаньне абароны правоў падаткаплацельшчыкаў і спажыўцоў, г.Ваўкавыск

Гіль Міхаіл - цэнтар грамадзкіх ініцыятываў "Сумежжа", г.Паставы

Корбан Юры - маладзёвы цэнтар "Контур", г.Віцебск

Грамыка Алег - Беларускае грамадзкае сацыяльна-экалягічнае аб`яднаньне "Зялёны сьвет", г.Гомля

Скораход Галіна - Вабласное грамадзкае жаночае аб`яднаньне "Ініцыятыва", г.Гомля

Адзінец Сяргей - Гомельскае вабласное маладзёвае грамадзкае аб`яднаньне "Гарт", г.Гомля

Цэцура Аляксандар - незалежны прафсаюз прадпрымальнікаў, г.Салігорск

Моргаль Аляксандар - інфармацыйна-адукацыйны цэнтар "XXI стагодзьдзе", г.Пінск

Гоўша Сяргей - Правабарончы цэнтар , г.Баранавічы

Рымашэўскі Віталь - Маладзёвы хрысьціянска-сацыяльны саюз, г.Менск

Івашкевіч Віктар - Камітэт Абароны Правоў Працоўных

Бакіевіч Рыгор - "Брэсцкае Пагадненьне"

Аскерко Анатоль - Барысаўскае адзьдзяленьне праваабарончага цэнттара "Вясна"

Хвосцік Аляксей - Рэгіянальны цэнтар грамадзянскіх ініцыятываў, Маладэчна

Кузьмін Андрэй - "Кантакт-цэнтар", г.Крычаў

Дзілендзиік Мікалай - Салігорскі клюб грамадзянскіх ініцыятываў

Катляроў Аляксандар - Слуцкае адзьдзяленьне цэнтару"Беларускія ініцыятывы"

Краўчанка Ўладзімер - грамадзкае аб`яднаньне Магілёўскі прававы цэнтар

Капуцкі Аляксандар - КРДС, Маладэчна

Сідун Крысьціна - Згуртаваньне беларускіх студэнтаў РМТА

Біяграфія Сямёна Мікалаевіча Домаша

Домаш Сямён Мікалаевіч нарадзіўся 2.01.1950. у Брэсцкай вобласьці. Беларус.Безпартыйны. Праваслаўны. Адукацыя вышэйшая. Эканаміст. Скончыў Бабруйскі аўтатранспартны тэхнікум, Беларускі дзяржаўны інстытут народнай гаспадаркі, Вышэйшую Партыйную Школу.

Працоўную дзейнасьць пачаў у 1969 годзе механікам па рамонце аўтамабіляў Астравецкай аўтабазы №4 Гародзенскага аблкіраваньня.

З 1970 па 1974гг. - галоўны інжынэр, з 1974 па 1977гг. - дырэктар Астравецкай аўтабазы №4 Гародзенскага аблкіраваньня.

1977-1982 - дырэктар Гародзенскага аўтакамбіната №1.

1982-1983гг. - заг.прамыслова-транпартным адзьдзелам Гаркама КПБ г. Гародні.

1983-1987гг. - другі сакратар Кастрычніцкага райкама КПБ г. Гародяа, курыраваў прамысловасьць, транспарт, будаўніцтва і іншыя галіны народнай гаспадаркі раёну.

У 1987гг.выбраны старшынёй гарвыканкаму г. Гародня.

У 1990г. старшыня Гародзенскага гарвыканкаму і гарадзкога Савету дэпутатаў.

У 1993г. абраны старшынёй Гародзенскага абласнога Савету дэпутатаў.

Дэпутат Вярхоўнага Савету Рэспублікі Беларусь 12-га й 13-га скліканьня.

У траўні 1996 года - выбраны членам Прэзыдыума Вярхоўнага Савету Рэспублікі Беларусь 13-га скліканьня.

З сакавіка 1997 каардынуе дзейнасьць дэмакратычных палітычных, грамадзкіх, прафсаюзных арганізацыяў Гродзенскай вобласьці, а з траўня 2000г, - і дзейнасьць аб`яднаньня "Рэгіянальная Беларусь" - шырокай кааліцыі, у склад якой уваходзяць грамадзкія, прафсаюзныя й палітычныя дэмакратычныя арганізацыі ўсіх вабласьцей Беларусі.

Жыве ў г. Гародні. Жанаты. 2 сыны, унук.

Адказная прамова Сямёна Домаша ў адказ на заяву аб яго падтрымцы

Шаноўнае спадарства!

Паважаныя лідары грамадзкіх аб`яднаньняў!

Паважаныя калегі!

Паважаныя прадстаўнікі СМІ!

Дазвольце мне перш за ўсё павіншаваць вас з новым годам, новым стагодзьдзям, новым тысячагодзьдзям!

Прыміце шчырыя пажаданьні шчасьця, дабрыні, посьпехаў у вашых справах, жадаю каб спраўдзіліся ўсе вашыя мары.

Мяркую, выкажу агульнае жаданьне, каб у гэтым годзе ў нашым жыцьці, у жыцьці нашага народу адбыліся перамены да лепшага.

Разам з тым мы ўсе добра разумеем, што самі па сабе гэтыя зьмены адбыцца ня могуць. Мы павінны іх дабіцца. І ў гэтым годзе лёс надае нам такую магчымасьць - выбраць па якому шляху пайсьці. Або мы будзем жыць ва ўмовах дыктатуры, працягваць падаць у бездань і зачынем сабе на шмат гадоў шлях у цывілізаваны сьвет.

Або мы спынем гэтае падзеньне й пачнем будаваць дэмакратычную прававую дзяржаву з годным узроўнем жыцьця. Адновім меркаваньне, што склалася вякамі пра беларускі народ, як добрага гаспадара, які ўмее жыць у сяброўстве з усімі сваімі суседзямі.

Сёньня напачатку абвяшчэньня прэзыдэнцкіх выбараў, шмат хто з палітолягаў і аналітыкаў падзяляюць нашае грамадзтва, палітычныя сілы на розныя цэнтры й групоўкі. Зьнешне яно нібыта так і выглядае.

Па сутнасьці Лукашэнка падзяліў нашае грамадзтва на дзьве часткі: адна - гэта ён сам са сваімі паплечнікамі й другая - гэта народ, думку якога сьмела выказваюць грамадзкія, палітычныя і прафсаюзныя арганізацыі, перш за ўсё дэмакратычнага накірунку.

Адсюль і два цэнтра супрацьстаяньня на будучых прэзыдэнцкіх выбарах: адзін - сфарміраваны Лукашэнка, які фактычна знаходзіцца ў апазыцыі да грамадзтва й другі - які можа быць сфарміравны стварэньнем шырокай каааліцыі грамадзкіх палітычных арганізацыяў і прафсаюзаў. Я ўпэўнены, што мы здолеем гэта зрабіць.

Сёньня ў вашай асобе атрымана падтрымка ўплывовых і аўтарытэтных аб`яднаньняў як рэспубліканскага так і мясцовага ўзроўню. Зроблены яшчэ адзін сур`ёзны шлях да стварэньня кааліцыі, якая будзе прадстаўляць самыя шырокія слаі беларускага грамадзтва.

Дзякую ўсіх вас за падтрымку, за давер, які вы аказваеце мне асабіста. Я гатовы і зраблю ўсё, што будзе ад мяне залежыць для нашай перамогі!

Будзем разам і мы пераможам!