Валеры Шчукін зьбіты міліцыяй і знаходзіцца ў шпіталі :: Хартыя'97 :: Навiны

Журналіст, лаўрэат Нацыянальнай прэміі па абароне правоў чалавека Валеры Шчукін ня быў дапушчаным 16 студзеня на прэс-канферэнцыю міністра ўнутраных справаў Уладзіміра Навумава. Супрацоўнік Прэс-службы МУС маёр Быкаў абвесьціў, што аб прэс-канферэнцыі былі папярэджаны дзяржаўныя СМІ і допуск ажыцьцяўляецца па папярэдняй акрэдытацыі. Прэс-канферэнцыя зьяўляецца адкрытым мерапрыемствам і згодна з Законам "Аб друку і іншых сродках масавай інфармацыі" доступ на такія мерапрыемствы для журналістаў свабодны, а пры акрэдытацыі іх яшчэ мусяць загадзьдзя папярэджваць. Не зважаючы на журналісцкае пасьведчанне, Шчукіна затрымалі на ўваходзе ў Міністэрства ўнутраных спраў, дзе праходзіла прэс-канферэнцыя.

Пры гэтым яго павалілі на падлогу і закруцілі рукі трое супрацоўнікаў службы аховы будынку пад кіраўніцтвам начальніка службы капітана Ляліна. Пры затрыманьні было разьбіта шкло ў дзьверах і Валеры Шчукін парэзаўся. Пакуль прыехала машына хуткай дапамогі, якую выклікалі па патрабаваньні прэсы, журналіст ляжаў у крыві на падлозе 18 хвілінаў без медычнай дапамогі; за рукі яго трымалі супрацоўнікі МУС, прыціскаючы да падлогі.

Паводле сведчаньня відавочцаў, Шчукін страціў шмат крыві. Его адвезлі ў шпіталь у суправаджэньні міліцыянераў. Зараз ён знаходзіцца ў ваенным шпіталі на вуліцы Варвашэні.

На прэс-канферэнцыі міністр унутраных справаў Уладзімір Навумаў пракаментаваў гэты эпізод так: "Я не лічу Шчукіна журналістам ".