Пракуратура палічыла дыягназ доктара Шчыгельскага ў адносінах да Лукашэнкі "паклёпам" :: Хартыя'97 :: Навiны

Прэс-цэнтар Пракуратуры Рэспублікі Беларусь распаўсюдзіў вечарам 18 студзеня паведамленьне для прэсы. У ім гаворыцца:
12 студзеня ў сеці Інтэрнэт, а пасьля ў газэце "Наша свабода" распаўсюджаны паклёп у адносінах да Прэзыдэнта Рэспублікі Беларусь.
Па факту паклёпу ў дачыненьні да Прэзыдэнта Рэспублікі Беларусь А.Г.Лукашэнка пркуратурай рэспублікі ў адпаведнасьці з нормамі Крымінальна-працэсуальнага кодэксу 17.01.2001 г. узбуджана крымінальная справа па частцы 1 артыкула 367 Крымінальнага кодэксу Рэспублікі Беларусь (паклёп у дачыненьні да Прэзыдэнта Рэспублікі Беларусь).

З мэтаю поўнага й аб`ектыўнага расьсьледаваньня дадзенай крымінальнай справы створана сьледча-аператыўная група з супрацоўнікаў пракуратуры й Камітэту дзяржаўнай бясьпекі. Па справе праводзяцца неабходныя сьледчыя справы.

Выдавец і рэдактар газэты "Наша свабода" Павел Жук у сувязі з заяваю пракуратуры яшчэ раз падцьвердзіў прэс-цэнтру Хартыі сваю гатоўнасьць адстойваць правамернасьць публікацыі артыкула "Доктарскае заключэньне" у судзе. Аднак, адзначыў ён, пакуль не зразумела, хто канкрэтна будзе абвінавачвацца ў паклёпе - газэта, рэдактар, сам доктар Шчыгельскі (ён зараз знаходзіцца ў Амэрыцы) ці яшчэ хтосьці.

Дарэчы, частка 1 артыкула 367 Крымінальнага кодэксу Рэспублікі Беларусь ""Паклёп у дачыненьні да прэзыдэнта Рэспублікі Беларусь" прадугледжвае пакараньне ў выглядзе штрафу, або папраўчай працы на тэрмін да 2 гадоў, або абмежаваньня свабоды на тэрмін да 4 гадоў, або пазбаўленьня волі на той жа тэрмін.