Супрацоўнікі Беларускага КДБ на РТР? :: Хартыя'97 :: Навiны

Ёсьць інфармацыя, што кіраўніцтва РТР плануе ўвесьці на карпункце свайго каналу ў Менску новую пасаду - прадзюсэра. У беларускай сталіцы пагаворваюць, што на гэтым месцы можа апынуцца супрацоўнік прэс-групы УКДБ Беларусі па Менску й Менскай вобласьці Андрэй Качура.

Падставаў для такіх размоваў апынулася больш чым дастаткова.

Па-першае, Андрэй Качура - аднакурсьнік вядомага расейскага журналіста, вядучага "Весцяў" Яўгена Равенка. Яны разам сканчвалі Ільвоўскае Вышэйшае ваенна-палітычнае вучылішча - адзінае навучальная ўстанова на прасторы былога Савецкага Саюзу, дзе рыхтавалі ваенных журналістаў. Прычым яны - не толькі аднакурсьнікі, але й добрыя сябры. У адным са сваіх інтэрв`ю спадар Равенка неяк сказаў, што не бачыць нічога дрэннага ў тым, што ён мае сяброў у беларускім КДБ. Вядома, што нядаўна Яўген Равенка знаходзіўся ў Менску. Ён прыязджаў у беларускую сталіцу разам з кіраўніком карэспандэнцкай сеткі УГРК Аляксеем Кузьміным, карэспандэнтам РТР Анатолем Сауціным. Натуральна, што Равенка сустракаўся са сваім менскім сябрам. І вельмі верагодна, што прапанаваў свайму сябруку па вучылішчу пасаду на РТР.

Акрамя таго, у той самы час Андрэй Качура разам з карэспандэнтам РТР Анатолем Сауціным езьдзіў у Гомельскую вобласьць, дзе расейскія журналісты здымалі сюжэт для праграмы "Весці". Кажуць, што Качура езьдзіў туды ледзь не ў якасьці прадзюсэра РТР.

Праўда, сам Качура вышэйназваны факт адмаўляе. Кажа, што ён як працаваў, так і працуе ў прэс-групе УКДБ Беларусі па Менску й Менскай вобласьці. Працу на РТР яму не прапаноўвалі, і з карэспандэнтамі расейскага каналу ён езьдзіў па старому сяброўству. "З Яўгенам Равенка мы сапраўды разам навучаліся, - сказаў Яўген Качура. - У мяне шмат знаёмых і на РТР, і на НТВ. І Сауцін таксама мой сябра. Паколькі ён ніколі ня быў на Беларусі, я дапамагаў яму ў паездцы па Гомельскай вобласьці.

Наколькі мне вядома, Равенка не займаецца на РТР адміністратыўнай працай. Калі б прапанова працаваць прдзюсэрам да мяне паступіла ад Кузьміна - тады можна было б пра што-небудзь гаварыць. Даваў або не даваў Равенка рэкамендацыі - я не ведаю. Гэта яго асабістая справа. Мы з Жэнем аб працы не размаўлялі. Я наогул ніколі прынцыпіяльна не прасіўся на працу. А пасада прадзюсэра ў Менскім бюро РТР пакуль ня ўведзена".

Як усё будзе на самой справе - пакажа час.