У Савеце Эўропы зноў паўстае "беларускае пытаньне" :: Хартыя'97 :: Навiны

Палітычны камітэт Рады Эўропы на паседжаньні ў Страсбургзе 22-га ці 23-га студзеня ізноў будзе разглядаць беларускае пытаньне. Беларускае пытаньне - гэта статус "нацыянальнага сходу" Рэспублікі Беларусь у Парлямэнцкай Асамблеі Рады Эўропы. Яшчэ ў студзені 1997 году бюро Парлямэнцкай асамблеі прыпыніла статус "адмыслова запрошанага" для найвышэйшага заканадаўчага органу Беларусі. Прычына - уплывовая міжнародная арганізацыя не прызнае вынікаў лістападаўскага рэфэрэндуму 1996 году.

З той пары ўлады Беларусі просяць разглядзець пытаньне пра вяртаньне страчанага статусу, і структуры Парлямэнцкай асамблеі штогод яго разглядаюць. Пры гэтым штораз канстатуюць, што перагледзець рашэньне немагчыма, бо Беларусь моцна адстае ад стандартаў Рады Эўропы што да плюралістычнай дэмакратыі, вяршынства права і правоў чалавека.

Апошні разгляд адбыўся роўна год таму - асамблея абмеркавала даклад Вольфганга Бэрандта й пацьвердзіла свае ранейшыя высновы. Традыцыйна ў Страсбургу выкладалі свой погляд на сытуацыю ў Беларусі дзьве беларускія дэлегацыі - ад Вярхоўнага Савету 13-га скліканьня і ад гэтак званай Палаты прадстаўнікоў 1-га скліканьня.

Сёлета на паседжаньне таксама запрошаныя дзьве дэлегацыі - адна ад гэтак званай Палаты 2-га скліканьня, другая ж - не ад Вярхоўнага Савету, а ад палітычнай апазыцыі. Гэта экс-прам`ер Міхаіл Чыгір, лідар жаночай партыі Валянціна Палевікова, віцэсьпікер Вярхоўнага Савету Анатоль Лябедзька. Ў Стразбург былі запрошаныя таксама лідар"Рэгзянальнай Беларусі" Сямён Домаш і старшыня прафсаюзаў Уладзімер Ганчарык, аднак яны адмовіліся ехаць, спаслаўшыся на занятасьць.

З боку палаты ў склад дэлегацыі ўвайшлі экс-дэмакраты Абрамава й Навасяд, што спрабавалі сарваць восеньскі байкот выбараў у "парлямэнт" з боку дэмсілаў краіны. Узначальвае "палатачнікаў" сябра Лукашэнка Уладзімер Канаплёў. Ва ўладаў ёсьць рэальны шанец паспрабаваць зьмяніць становішча з непрызнаньнем палаты ў ПАСЭ. Гэты шанец, на думку назіральнікаў, з`явіўся з-за інтрыгаў той часткі эўрапэйскіх краінаў, якім выгадна існаваньне рэжыму Лукашэнка па прычыне нейкіх грашовых і палітычных інтарэсаў у нашшым рэгіёне.